කුරුල්ලන් වනාන්තරවල සිට නාගරික ජීවිතයට වඩාත් හුරු වී ඇතැයි ඇමෙරිකාවේ කුරුළු පර්යේෂකයෝ පිරිසක් කියති.

ඇමෙරිකාවේ චිකාගෝ නගරයේ සහ ඒ අවට ග්‍රාමීය ප්‍රදේශවල ගෙවතු දස ලක්ෂයකින් ලබාගත් තොරතුරු පදනම් කරගනිමින් ඔවුහු මේ බව කියා සිටිති.

ශාන්ත එඩ්වඩ් විශ්ව විද්‍යාලයේ ජේ.එමී බෙලාරි මහත්මිය හා චිකාගෝ නුවර ඉල්ලිනොයිස් විශ්වවිද්‍යාලයේ ක්‍රිස්ටෝපර් වෙලාන්  මහතා මේ පර්යේෂණයේ නාකත්වය දැරූහ.

පර්යේෂකයන් පෙන්වාදෙන්නේ වනාන්තරයේ හා තුරුමත කූඩු සෑදූ පක්ෂීන් දැන් මිනිසුන්ගේ නිවෙස්වල කූඩු සෑදීමට වැඩි නැඹුරුතාවක් දක්වන බවයි. ඔවුන් පරිසරයෙන් හමුවන කොළ රොඩු පරඩැල් ආදිය ගෙනවිත් වැහිපිහිලි, වහළේ ඉඩ ඇති තැන් මෙන්ම බිත්ති කණ්ඩි මතත්, විදුලි ලාම්පු මතත් කූඩු සාදමින් තම වර්ගයා බෝ කිරීමට නැඹුරුව ඇත්තේ පුදුම සහගත ලෙස බව ද පර්යේදකයෝ පෙන්වා දෙති.

ඔවුන් වැඩිදුරටත් පවසන්නේ බොහෝ නිවැසියන් කුරුල්ලන් තම නිවසේ පදිංචි වීම සම්බන්ධයෙන් ඉතා ධනාත්මක අදහස් දැක්වූ බවයි. කුරුල්ලන් සතුටින් පිළිගැනීමට බලා සිටි බව ද මේ වාර්තාවේ සඳහන් කැර ඇත. එසේ වුව ද වැඩි පිරිසකට මේ පක්ෂීන් පිළිබඳ දැනුමක් නොමැති බව ද පර්යේෂකයෝ පවසති. පක්ෂීන්ගේ හැසිරීම් රටාවන්, ඔවුන්ගේ ආහාර රටාවන් හා පැවැත්ම ගැනත් නිවැසියන්ට ඇති දැනුම අල්ප බවත් පර්යේෂණයෙන් අනාවරණය වී ඇත.

ගෙවතු සමීක්ෂණය කිරීමේ දී තම ගෙවත්තේ සැරිසරණ පක්ෂීන් විශේෂ සංඛ්‍යාත්මකව හෝ නොදැන සිටීමත් ඇතැම් පුද්ලයන් තම ගෙවත්තේ සිටින පක්ෂීන් වර්ග කිසි දිනක දැක නොතිබූ බවත් ආනවරණය වී ඇත.

‘‘අපගේ අධ්‍යයනයෙන් පෙනී ගියා මේ මිනිසුන්ගේ නිවාස ආශ්‍රිතව පක්ෂීන්ගේ විවිධත්වය පුදුම සහගත ලෙස ඉහළ ගිහින් තිබෙන බව. නමුත් තමන්ගේ අසළට පැමිණි මේ සෞන්දර්යාත්මක සොඳුරු අමුත්තන්ගෙන් පරිසරයට සිදුවන මෙහෙවර ගැන අපේ ජනතාව දැනුම්වත් වී නැහැ. ඔවුන් මේ ජෛව විවිධත්ය ගැන දැනුම්වත් කළ යුතුයි. “ බෙලාරි මහත්මිය පවසයි.

පර්යේෂකයන් පෙන්වාදෙන්නේ මෙය සාමාන්‍ය ව්‍යාපෘතියක් ලෙස පෙනී ගිය ද මේ අධ්‍යයනය කුරුල්ලන්, නගර වැසියන් හා ස්වභාවික ලෝකය අතර ඇති අපූරු සම්බන්ධතාව හා එය වර්ධනය වෙමින් ක්‍රමිකව විකාශනය වන ආකාරය ගැන ඉතා වැදගත් තොරතුරු රැසක් හෙළිවන පරීක්ෂණයක් බවයි.