• ප්‍රේෂණ ලැබීම් ඩොලර් මිලියන 751.1 ක් දක්වා 31.1%ක වර්ධනයක් පෙන්වයි
  • ජනවාරියේදී සංචාරක පැමිණීම් 277,327ක් දක්වා 9.7% ක වර්ධනයක්
  • සංචාරක ආදායම් ඩොලර් මිලියන 378.3ක් දක්වා 5.6%කින් පහළට

විමුක්ති එස් රුද්‍රිගු

මෙම වසරේ ජනවාරි මාසයේදී  විදේශයන්හි සිටින ශ්‍රී ලාංකිකයන් මෙරටට ඒවා ඇති ප්‍රේෂණ මුදල් ප්‍රමාණය සැලකිය යුතු මට්ටමකින් වර්ධනය වෙද්දී සංචාරක කර්මාන්තය හරහා සිදු කළ ඉපැයීම් සුළු වශයෙන් පහළ ගොස් ඇතැයි ශ්‍රී ලංකා මහ බැංකුව නිකුත් කළ නවතම දත්ත වාර්තාවේ දැක්වේ.

මෙම වසරේ ජනවාරි මාසයේදී විදේශයන්හි සිටින ශ්‍රී ලාංකිකයන් මෙරටට ඇමෙරිකානු ඩොලර් මිලියන 751.1 මුදලක් මෙරටට ඒවා ඇති බවත් එය පසුගිය වසරේ ජනවාරි මාසයට සාපේක්ෂව සියයට 31.1ක වර්ධනයක් බවත් එහි දැක්වේ. 

එසේම මෙම වසරේ ජනවාරි මාසයේදී සංචාරක කර්මාන්තයෙන් ශ්‍රී ලංකාව ඇමෙරිකානු ඩොලර් මිලියන 378.3 ක් උපයා ඇති බවත් එය පසුගිය වසරේ ජනවාරි මාසයට සාපේක්ෂව සංචාරක ඉපැයීම්වල සියයට 5.6 ක පහළ යාමක් බවත් එම වාර්තාව පෙන්වා දෙයි.

2025 වසරේ ජනවාරි මාසයේදී විදේශයන්හි සිටින ශ්‍රී ලාංකිකයන් මෙරටට ඇමෙරිකානු ඩොලර් මිලියන 573 ක් මෙරටට එවා තිබූ බවත්, 2025 වසරේ ජනවාරි මාසයේදී සංචාරක කර්මාන්තයෙන් ඇමෙරිකානු ඩොලර් මිලියන 400.7 ක මුදලක් උපාය ඇති බවත් එම වාර්තාවේ වැඩිදුරටත් දැක්වේ.  

පසුගිය වසරේදී විදේශයන්හි සිටින ශ්‍රී ලාංකිකයන්  ඇමෙරිකානු ඩොලර් බිලියන 8.07 ක වාර්තාගත මුදලක් මෙරටට ඒවා තිබිණි. ආර්ථික අර්බුදය හමුවේ මෙරට ශ්‍රම බළකායෙන් විශාල පිරිසක් රැකියා සඳහා විදේශගත වීම දිනෙන් දින මෙරටට ලැබෙන විදේශ ප්‍රේෂණ ඉහළ යාම හේතුවක් වී ඇති අතර මෙරට විදේශ විනිමය ඉපැයීමේ ප්‍රධාන මාර්ගය වන්නේද විදේශගතව සිටින ශ්‍රී ලාංකිකයන් මෙරටට එවන මුදල්ය.

සංචාරක ඉපැයීම් මෙම වසරේ ජනවාරි මාසයේදී සියයට 5.6 කින් පහළ ගොස් ඇතත් සංචාරකයන් පැමිණීම සියයට 9.7 කින් වර්ධනය වී ඇතැයි එම වාර්තාවේ සඳහන් වේ. මෙම වසරේ ජනවාරි මාසයේදී මෙරටට 277,327 ක සංචාරකයන් පිරිසක් මෙරටට පැමිණ තිබිණි.