• ව්‍යාපෘතියේ සමස්ත ආයෝජනය ඩොලර් 6,875,000 ක් 
ඇක්සස් ඉන්ජිනියරින්ග් පීඑල්සී සමාගම මගින් ඉදි කළ පිළිකා හඳුනාගැනීමේ ඖෂධ නිෂ්පාදන පරිශ්‍රයක් (Cyclotron Based Radiopharmaceutical Production Facility) අද දිනයේදී විවෘත කෙරෙන බව එම සමාගම පවසයි. 
එම සමාගමෙහි සියයට 60ක කොටස් හිමිකාරීත්වයක් සහිත Access Medical Tracers (පෞද්) සමාගම මගින් මෙම ව්‍යාපෘතිය කර තිබේ. 2024 වසරේ නොවැම්බර් මාසයේදී ආරම්භ වූ මෙම ව්‍යාපෘතිය සඳහා එම සමාගම කළ ආයෝජනය ඩොලර් 6,875,000 කි. 
කැබිනට් මණ්ඩලය විසින් ලබාදුන් අනුමැතියක් යටතේ ඉදිකිරීම, මෙහෙයුම් පවත්වාගෙන යාම සහ හිමිකාරීත්වය (BOO) යන එකඟතාව මත ඇක්සස් ඉන්ජිනියරින්ග් සමාගම මෙම පරිශ්‍රය ඉදිකර ඇත.  
මෙම ව්‍යාපෘතියේ සියයට 20ක කොටස් හිමිකාරීත්වයක් ඇක්සස් ඉන්ටර්නැෂනල් (පෞද්) සමාගම වෙතත්, සියයට 10ක් ශ්‍රී ලංකා පරමාණුක බලශක්ති මණ්ඩලයටත්, ඉතිරි සියයට 10 සෞඛ්‍ය අමාත්‍යාංශයටත් හිමිය. 
ශ්‍රී ලංකාව තුළ මෙවැනි පරිශ්‍රයක් ඉදිකරන පළමු අවස්ථාව වන අතර, එහිදී නිපදවන FDG (Fluoro – Deoxy – Glucose ඖෂධය මූලිකවම පිළිකා හඳුනාගැනීම සඳහා යොදා ගන්නා බව ඇක්සස් ඉන්ජිනියරින්ග් පීඑල්සී සමාගම පවසා තිබේ.