රසායනික අවි භාවිතා කර පහර දී අහිංසක සිවිල් වැසියන් ඝාතනය කරන බවට සිරියානු ජනාධිපති බෂීර් අල් අසාද්ගේ රජයට චෝදනා කරමින්, සිරියාවට එරෙහිව හමුදා ප‍්‍රහාරයක් එල්ල කිරීමට ඇමෙරිකාව සැරැසෙයි.

ඇමෙරිකාව සිරියාවට හමුදා ප‍්‍රහාරයක් එල්ල කරන්නේ නම්, තමන් ඇමෙරිකාවටත් ඇමෙරිකා හමුදාවටත් සහාය දෙන බව  ඊශ‍්‍රායලය කියා සිටී. එරට නියෝජිත කණ්ඩායමක් ඊයේ (27) ධවල මන්දිරයේදී ජනපති ඔබාමා හමුවී සාකච්ඡා පැවැත්වීය.

සිරියානු රජය රසායනික අවි භාවිතා කරමින් අහිංසක සිවිල් වැසියන් මරා දමන බවට ඇමෙරිකා රජය චෝදනා කරන්නේ ඉකුත් 21 වැනිදා, සිරියාවේ ඩමැස්කස් අගනුවරට නුදුරු නගර කිහිපයකට එල්ල වූ සෙරීන් විස වායු ප‍්‍රහාරය හේතුවෙනි.

එම විස වායු ප‍්‍රහාරයෙන් සිවිල් වැසියෝ 1,700 ක් ජීවිතක්ෂයට පත්වූහ. 4,000 ක් රෝගී වූහ. ඒ අතර සිටින බොහෝ දෙනා කුඩා දරුවෝය. ඇමෙරිකාව ප‍්‍රමුඛ බටහිර රටවල් කියා සිටියේ එය මහා මානව සංහාරයක් කියාය.

විස වායු ප‍්‍රහාරයට සිරියානු රජය වගකිව යුතු යැයි කියමින්, එරටට එරෙහිව හමුදා කි‍්‍රයා මාර්ගයක් ගැනීමෙන් වළකින්නැයි සිරියානු රජයේ හිතවතුන් වන ඉරානයත් රුසියාවත් ඇමෙරිකාවට අනතුරු අඟවා ඇත.

ඇමෙරිකාව සිරියාවට එරෙහිව පහරදීමක් කළොත් ඉරානය ඊට මැදිහත් වුවහොත් එය නිමිත්තක් කර ගනිමින් ඊශ‍්‍රායලය ඇමෙරිකාව සමඟ එක් වී ඉරානයට පහර දෙනු ඇතැයි යුද විශ්ලේෂකයෝ පෙන්වා දෙති.