අභිනවයෙන් සෞදි අරාබියේ රජ පුටුවට පත්වූ සල්මන් අබ්දුල්ලාසිස් අල් සවුද් රජු එය සමරනු වස් සෞදි අරාබි ජනතාවට පවුම් බිලියන 21 ක පමණ මුදලක් බෙදාදී තිබේ.

වැටුප් වැඩිවීම් හා වෙනත් දීමනා ලෙස මෙම මුදල ජනතාවට ලබාදීම සිදුව තිබෙන අතර සාහිත්‍ය සංගම්,කී‍්‍රඩා සංගම් ආදියටද නොමසුරුව මුදල් ප‍්‍රදානය කර ඇත.

‘මාගේ ජනතාවනි,ඔබලාට මීට වඩා දෙයක් ලැබිය යුතුයි. මා කුමක් කළත් මට ඔබලාගේ වටිනාකම හා සමවන දෙයක් කළ නොහැක‘. යැයි සල්මන් රජු ඔහුගේ ට්විටර් ගිණුමේ සඳහන් කර තිබේ.

නොසිතූ ලෙස පෑදුණු මෙම වාසනාවෙන් සෞදි ජනතාව කුල්මත්ව සිටින බව විදේශ මාධ්‍ය වාර්තා කරයි.ඇතැමෙක් නව ජංගම දුරකථන,ආභරණ ආදියට මුදල් වියදම් කරද්දී තවත් අය තම පළමු බිරිය හෝ දෙවැනි හෝ තෙවන බිරිය කැන්දාගෙන ඒමට මුදල් වෙන්කරගෙන සිටින බව එම වාර්තාවන්ගේ දැක්වේ.

නව රජු සල්මන් බලයට පත්වූයේ තම සොහොයුරා වූ අබ්දුල්ලාහ් නිව්මෝනියාවෙන් දීර්ඝ කාලයක් පීඩාවිදීමේ ප‍්‍රතිඵලයක් ලෙස පසුගිය මාසයේදී මරණයට පත්වීමත් සමගය.ඔහු මියයන විට 90 වැනි වියේ පසුවිය.

අබ්දුල්ලා රජු බලයට පත්වූ 2005 වසරේදීද එය සැමරීමට ඔහුද මෙලෙසම විශාල මුදලක් සෞදි ජනතාව අතර බෙදා හැරීමට කටයුතු කළේය.

කෙසේවුවත් ආර්ථික විශ්ලේෂකයින් පවසන්නේ මෙසේ අධික මුදල් ප‍්‍රමාණයක් එකවර ජනතාව අතර බෙදා දීමේ පිළිවෙත නතර කිරීමට ඉදිරි සෞදි නායකයින් කටයුතු කළ යුතු බවය.ලෝක වෙළදපොලේ තෙල් මිල අස්ථාවර හෙයින් මුදල් උපයා ගැනීම දුෂ්කර වෙමින් පවතින සමයක සෞදි අරාබිය මෙසේ ඔවුන්ගේ මුදල් සංචිත දියකර හැරීම අනාගතයට කිසිසේත්ම යහපත් නොවන බව ඔවුන් පෙන්වා දේ.