පකිස්තානයට එරෙහිව 1971 ජාතික නිදහස් සටනේදී දාමරික ක්‍රියා සහ සමූල ඝාතන සම්බන්ධයෙන් බංග්ලාදේශයේ ප්‍රධානම ඉස්ලාමීය පක්ෂය වන ජමාල් ඉ ඉස්ලාමි පක්ෂයේ නායක මෞතියර් රහුමාන් නිසාමිට එරට ශ්‍රේෂ්ඨාධිකරණය මරණ දඬුවම නියම කර ඇතැයි විදෙස් ආරංචි කියයි.

යුද අපරාධ සම්බන්ධයෙන් පසුගිය වසරේ සිදුකළ විශේෂ අධිකරණ ක්‍රියාවලියකින් පසු ජනසංහාරය, මිනී මැරුම්, වද හිංසා පැමිණවීම්, දූෂණ සහ දේපළ වැනසීම යන චෝදනා 16ක් යටතේ නිසාමිට දඬුවම් නියම කැරිණි.

ශ්‍රේෂ්ඨාධිකරණයේ විනිසුරු මඩුල්ලේ ප්‍රධානී සුරේන්ද්‍ර කුමාර් සිංහා අද (6) නිසාමි ඉල්ලා තිබූ ඇපැල් ප්‍රතික්ෂේප කළේය. ජනපති සමාව ලැබුණොත් පමණක් ඔහුට මරණ දඬුවමින් ගැලවිය හැකි බව එරට ආරංචි පවසයි.

බංග්ලාදේශ ආරංචි කියනුයේ යුද සමයේදී පකිස්තාන හා එරට සොල්දාදුවන් එකතුව මිලියන 3ක පමණ පුද්ගලයන් ඝාතනය කර ඇති බවත් කාන්තාවන් ලක්ෂ 2ක් පමණ දූෂණයට ලක් කර ඇති බවත්ය.