ප‍්‍රහාරක ගුවන් යානා දෙකක හා එහි නියමුවන් දෙදෙනගේ සහයෙන් මරණාසන්නව සිටි රෝගියකුගේ දිවි ගලවාගැනීමට නෝර්වේහි බොඬේ නගරයේ රෝහලක කාර්යමණ්ඩලය සමත්වූහ.

මරණාසන්නව සිටි රෝගියාට ප‍්‍රතිකාර කිරීමට අවැසි වූ උපකරණ රෝහලේ නොතිබුණු අතර සැතපුම් 280 ක් දුරින් තවත් රෝහලක එම උපකරණ තිබෙන බව ඔවුනට දැනගන්නට ලැබිණ.

මේ සා දුරක් එම භාණ්ඩ ප‍්‍රවාහනය කර රෝහලට ගෙන්වාගත්තද ඒ වන විට රෝගියා මියගොස් සිටිනු ඇති බව තේරුම් ගත් ඔවුහු වහාම නෝර්වේ ගුවන්හමුදාව ඇමතූහ.

අවශ්‍යතාවය පැහැදිලි කළ පසු ගුවන් බලධරයෝ ඔවුනට උදව් කිරීමට පොරොන්දු වූහ.රෝහලට ආසන්න ගුවන් හමුදා කඳවුරකින් පුහුණු සැසියක් සදහා ගුවන්ගතවීමට සූදානමින් සිටි ගුවන්යානා දෙකක නියමුවන්ට රෝහලේ අවශ්‍යතාවය දැනුම්දෙනු ලැබිණ.

වාසනාවට මෙන් එක් ගුවන්යානයක භාණ්ඩ ප‍්‍රවාහනය කිරීමට හැකිවන සේ අමතර කොටසක් සවිකර තිබිණ.

විනාඩි 25 ක කාලයක් ඇතුළත දුරින් පිහිටි රෝහලේ සිට රෝගියා සිටි රෝහල දක්වා අදාළ උපකරණ ගෙනවිත් දීමට නියමුවන්ට හැකිවිය.

සාමාන්‍යය අවස්ථාවකදී මෙම ප‍්‍රදේශයේ පියාසැරියක් සම්පූර්ණ කිරීමට විනාඩි 35 කට ආසන්න කාලයක් ගතවුවත් රෝගියාගේ ජීවිතය ගැන සිතා එය විනාඩි 25 කින් අවසාන කළ බව ගුවන්හමුදා කදවුරේ නියමු ප‍්‍රධානියා පැවසුවේය.

''ඔවුන් ඇසුවේ ගෙනෙන්නට තිබෙන උපකරණ වල ප‍්‍රමාණය ගැන විතරයි''. රෝහලේ ප‍්‍රකාශයකයෙක් කිවේය.