කාන්තා අධ්‍යාපන අයිතීය වෙනුවෙන් හඩ නැගීම නිසා තලේබාන් සංවිධාන තුවක්කුකරුවෙකුගේ වෙඩි පහරකට ලක්ව බරපතළ තුවාළ ලැබූ 14 හැවිරිදි මලාලා යුසාෆ්සා වැඩිදුර ප්‍රතිකාර සදහා එංගලන්තය බලා පිටත් කළ බව පාකිස්තාන ආරංචි මාර්ග සදහන් කරයි. මලාලා පාසල නිමවී නිවස බලා පැමිණෙමින් සිටි බස් රථයට ගොඩ වැදුණු තුවක්කුකරුවෙකුගේ වෙඩි පහරට ලක්වූයේ ඉකුත් 9 වැනිදාය. හිසට සිදුවූ බරපතල තුවාල නිසා අවිනිශ්චිත තත්ත්වයක සිටි ඇයගේ හිසෙන් උණ්ඩයක් ඉවත් කිරීමෙන් ඇයගේ තත්ත්වය යහපත් අතට හැරවීමට පාකිස්තාන වෛද්‍යවරුන්ට හැකි විය. එසේ වුවත් පූර්ණ ලෙස කායික හා මානසික සුවය ලැබීමට අවශ්‍ය ප්‍රතිකාර ලබා දීමට ඇය මෙසේ  එංගලන්තය බලා පිටත් කිරීමට පාකිස්තාන බලධාරීන් පියවර ගෙන තිබේ. මලාලාට පූර්ණ ලෙස සුවය ලබා ගැනීමට විධිමත් ප්‍රතිකාර මාලාවකින් පසුව හැකි වෙතියි   එංගලන්තයේ වෛද්‍යවරු කියති. (කෝවිගු)