(ක්‍රිෂාන් ජීවක ජයරුක්)

තෙදිනක් තිස්සේ නොකඩවා ඇදහැලෙන ධාරාණිපාත වර්ෂාව හේතුවෙන් අද (23) වන විට මාතර දිස්ත්‍රික්කයේ නිවාස තුනක් සම්පූර්ණයෙන් විනාශ වී නිවාස 86 අර්ධ හානි සිදු වී ඇතැයි මාතර දිස්ත්‍රික් ලේකම් කාර්යාලයේ ආපදා සහන සේවා සම්බන්ධීකරණ නිලධාරී අනුජන්ත විදානගේ මහතා පැවසීය.

වැලිපිටිය ප්‍රාදේශීය ලේකම් කොට්ඨාසයේ අර්ධ හානි නිවාස 16ක් ද හක්මන 14ක් ද මාතර 11ක් ද ආදී වශයෙන් නිවාස හානි වාර්තා වී තිබිණි.

පවතින අධික වැසි සහිත කාලගුණික තත්වය හේතුවෙන් ග්‍රාමසේවා නිලධාරීන් මාර්ගයෙන් තොරතුරු ලබා ගැනීමට පවා බාධා එල්ල වී තිබෙන බවත් එම හානිවීම් අද (24) වන විට විශාල වශයෙන් වැඩිවිය හැකි බවත් ඔහු කීය.

අධික වර්ෂාව හේතුවෙන් මාතර දිස්ත්‍රික්කයේ විශාල පවුල් සංඛ්‍යාවක් පීඩාවට ලක්ව සිටින බව කී විදානගේ මහතා එම සංඛ්‍යාවන් මේ දක්වා ගණනය කර නොමැති බවද වැඩිදුරටත් සඳහන් කළේය.

මේ අතර නිල්වලා ගග පිටාර ගැලීම නිසාඅකුරැස්ස,පානදුගම,අතුරලිය,කද්දුව,මාරගොඩ,පරදුව,වැලිපිටිය,පලල්ල,මාතර,කඩවීදිය,තිහගොඩ,ඉහළ විටියල,නාදුගල,වැල්ලේතොට,කඹුරුපිටිය,මාකදුර ආදී ප්‍රදේශරැසක් යටවී ජන ජීවිතය සම්පූර්ණයෙන්ම අඩාල වී තිබේ.

මේ නිසා බොහෝ පාසල්වල දරු දැරියන්ගේ පැමිණීම ද විශාල ලෙස පහත වැටී තිබිණි.

අකුරැස්ස සියඹලාගොඩ, කඹුරුපිටිය හා අකුරැස්ස මාරගොඩ යන ප්‍රධාන මාර්ග ඇතුළුව දිස්ත්‍රික්කයේ මංමාවත් විශාල ප්‍රමාණයක්ද ජලයෙන් යට වී ගමනාගමන කටයුතු ඇණ හිට ඇත.