(*** කටුනායක ටී.කේ.ජී. කපිල)

රුපියල් දෙකෝටි හතළිස් අට ලක්ෂයක් (2,48,00,000) වටිනා මෙතැම්පටමයින් නමැති විස මත්ද්‍රව්‍ය පෙති 4960 ක් ඇඟලුම් බහාලූ පෙට්ටියක සඟවා, කටුනායක කුරියර් භාණ්ඩ නිශ්කාශන මධ්‍යස්ථානයට ගුවන් මගින් එවා තිබියදී රේගු මත්ද්‍රව්‍ය පාලන අංශයේ නිලධාරීන් පිරිසක් විසින් ඊයේ (11) සවස අත්අඩංගුවට ගනු ලැබ ඇති බව රේගු මාධ්‍ය ප්‍රකාශක, අතිරේක රේගු අධ්‍යක්ෂ ජනරාල් සුනිල් ජයරත්න මහතා පැවසීය.

මෙම මත්ද්‍රව්‍ය පෙති එක්ස්ටසි (Ectasy) යන නමින්ද හඳුන්වන අතර, නාගරික ජන සමාජවල තරුණයන්ට මේවා ඉතා ඉහළ මිල ගණන්වලට අලෙවි කරන බවට වාර්තා වී ඇතැයි පොලිසිය කියයි.

කොළඹ 15 ප්‍රදේශයේ ලිපිනයකට නෙදර්ලන්තයේ සිට මෙම ඇඟලුම් බහාලුම ලැබී තිබුණ ද, එය මෙතෙක් බාර ගැනීමට කිසිවෙකු නොපැමිණි නිසා, ඒ පිළිබඳව සැක සිතූ රේගු මත්ද්‍රව්‍ය පාලන අංශයේ නිලධාරීන්, මෙම පෙට්ටිය විවෘත කර පරීක්ෂා කර බලා ඇත.

මෙම පෙට්ටිවල ව්‍යාජ ලෙස සකස් කළ බිත්ති තුළ මෙම මත්ද්‍රව්‍ය පෙති තොගය සඟවා තිබියදී සොයා ගැනීමට රේගු මත්ද්‍රව්‍ය පාලන අංශයේ නිලධාරීන් සමත්වී තිබේ.

මේ වනවිට මෙම බහාලුමේ සඳහන් ලිපිනය පිළිබඳව සොයා බැලුවද මෙහි නම සඳහන් අයෙකු සොයා ගැනීමට නොහැකි වී ඇති හෙයින් කිසිවෙකු මේ පිළිබඳව අත්අඩංගුවට ගෙන නොමැත.

මේ පිළිබඳව වැඩිදුර විමර්ශන කටයුතු රේගු මත්ද්‍රව්‍ය පාලන අංශයේ නිලධාරීන් විසින් පොලිස් මත්ද්‍රව්‍ය නාශක කාර්යාංශයේ නිලධාරීන්ට බාර දී ඇත.