කොරෝනා වයිරසයට එරෙහිව ක්‍රියාමාර්ග ගැනීම සඳහා අමෙරිකාවට සිදුකෙරෙන සියලු ආගමන කටයුතු තාවකාලිකව අත්හිටුවීමට එරට ජනපති ඩොනල්ඩ් ට්‍රම්ප් මහතා පියවර ගෙන ඇත.

ඒ අනුව මේ සඳහා තමා විධායක නියෝගයකට අත්සන් තබන බව ඔහු ප්‍රකාශ කළේය.

ට්විටර් පණිවිඩයක් නිකුත් කරමින් ඔහු මේ පිළිබඳ සඳහන් කර ඇති අතර එහිදී ඔහු කොරෝනා වෛරසය හඳුන්වා දී ඇත්තේ නොපෙනෙන සතුරෙකු ලෙසයි.

අමෙරිකානු පුරවැසියන්ගේ රැකියා ආරක්ෂා කිරීම මෙහි එක් අරමුණක් බව ද ජනපතිවරයා පෙන්වා දී තිබේ.

කොරෝනා වෛරසයේ දැඩි පැතිරීම අවසන් වී ඇති බැවින් රට නැවත විවෘත කරන්නැයි ධවල මන්දිරය ඉදිරිපත් කරන තර්කය හමුවේ සහ කොරෝනා වසංගතය මැඩපැවැත්වීමෙන් අමෙරිකාවේ ඇතැම් ප්‍රදේශ නැවත විවෘත කිරීමට එරට පරිපාලනය උත්සාහ දරන අවස්ථාවේ ජනපතිවරයාගේ මෙම තීරණය ඉදිරිපත් වී ඇත.

දේශසීමා ඔස්සේ සිදුවන අත්‍යවශ්‍ය නොවන ගමන් සීමා කිරීම අවම වශයෙන් මැයි මස මැද භාගය දක්වා දීර්ඝ කිරීමට අමෙරිකාව මේ වන විටත් කැනඩාව සහ මෙක්සිකෝව සමඟ එකඟ වී ඇත.

යුරෝපයෙන් සහ චීනයෙන් සිදුවන සංචාර දැඩි සීමාකිරීම්වලට ලක්කර ඇති නමුත් තාවකාලික රැකියා වීසා බලපත්‍ර හිමි පුද්ගලයින්, ශිෂ්‍යයින් සහ ව්‍යාපාරික සංචාරකයින් ඉන් නිදහස් කර ඇත.

අමෙරිකාවෙන් මේ වන විට වාර්තා වන කොරෝනා වෛරසය ආසාදිත රෝගීන් සංඛ්‍යාව 782,159 කි.

වෛරසය හේතුවෙන් මේ වන විට අමෙරිකාවේ සිදුවී ඇති මුළු මරණ සංඛ්‍යාව 41,816 ක් වේ. 


(බීබීසී ඇසුරෙනි)

-226-