(සෝල්හිදීය (රොයිටර්)

උතුරු කොරියානු හමුදාවේ ප්‍රධානියා ලෙස රි යොන්ග් ගිල් පත් කර ඇතැයි එරට රාජ්‍ය මාධ්‍ය අද (27) තහවුරු කළේය. 

මෙම පත් කිරීම උතුරු කොරියානු නායක කිම් ජොන්ග් උන් එරට ක්‍රියාත්මක කරන වෙනස්කම්වලින් එකකි. උතුරු කොරියානු නායකයා පසුගිය කාලයේදී අමාත්‍යධුර, හමුදාවේ තනතුරු ආදී කිහිපයක්ම වෙනස් කළේය. 

එක්සත් ජනපදය සමඟ රාජ්‍ය තාන්ත්‍රික සබඳතා ආරම්භ කිරීමේදීත් ආර්ථිකය දෙස අවධානය යොමු කිරීමේදීත් වයස්ගත පිරිස් වෙනුවට තමන්ට පක්ෂපාතී තමන්ගේ අණ සහ නියෝග කරන නව නිලධාරීන් පත් කිරීමට කිම් ජොන් කටයුතු කරමින් සිටින බව ඇමෙරිකා එක්සත් ජනපද නිලධාරීහු සහ විශ්ලේෂකයෝ පවසති. 

රි යොන්ග් ගිල් තරු හතරේ ජෙනරාල්වරයකු වූ අතර 2016 වසරේදී ඔහු නියෝජ්‍ය ප්‍රධානී ධුරයට පහත දැමූ අතර තරු තුනක් ද ඉවත් කළේය. ඊට නිශ්චිත හේතු මොනවාදැයි වාර්තා නොවීය.
 
ඔහුට අමතරව පළමු නියෝජ්‍ය ආරක්ෂක ඇමැති ලෙස කටයුතු කළ නෝ ක්වැන්ග් චොල් ආරක්ෂක ප්‍රධානී තනතුරටත්, එරට හමුදා ජෙනරාල්වරයකු වන කිම් සූ ගිල් කොරියානු හමුදාවේ බලවත්ම ඒකකය වන දේශපාලන අංශයේ ප්‍රධානී තනතුරට ද පත් කරනු ලැබ සිටී. 

අලුතෙන් තනතුරුවලට පත් කර සිටින නිලධාරීන් සියලු දෙනා අවුරුදු 60 වයස් සීමාවේ පසුවූවත් ඔවුන්ට කලින් සිටි නිලධාරීන්ට වඩා වයසින් අඩුවීම ද විශේෂත්වයකි. 

(055)