(ශාන්ත සෙනෙවිරත්න)

“මේ දිනවල වැඩිපුර කතාවෙන කොරෝනා වෛරසය රට තුළ ව්‍යාප්තවීම වැළැක්වීමට ආණ්ඩුව වහා පියවර ගත යුතුයි. ලැබී තිබෙන තොරතුරු අනුව ආණ්ඩුවේ ක්‍රියාමාර්ග ගැන අපට සතුටුවිය නොහැකි” යැයි ජනතා විමුක්ති පෙරමුණේ නායක පාර්ලිමේන්තු මන්ත්‍රී අනුර කුමාර දිසානායක මහතා පැවසීය.

පැලවත්ත පිහිටි ජනතා විමුක්ති පෙරමුණේ ප්‍රධාන කාර්යාලයේ අද(29) පෙරවරුවේ පැවති මාධ්‍ය සාකච්ඡාවකදී මන්ත්‍රීවරයා එසේ පැවසීය.

ඔහු මෙසේද කීය.

“කොරෝනා වෛරසය ගැන රටේ තිබෙන බිය සැක තවමත් පහව ගිහින් නැහැ. රෝගියෙක් හමුවෙලා කියනවා. මේ රෝගියා ආ ගිය තැන් ඇසුරු කළ අය සොයන්න අවශ්‍යයි. වෛරසය පැතිරයාම වළක්වන්න මීට වඩා සක්‍රීය දායකත්වයක් අවශ්‍යයි.

සේවක අර්ථසාධක අරමුදල තිබෙන්නේ මහබැංකුව බාරයේ. ඒ මුදල් ආයෝජනය කිරීම ගැටලුවක් නොවේ.නමුත් මේ මුදල් ආයෝජනය කරන්න ගිහින් විශාල පාඩුවක් සිදුව තිබෙනවා. අක්‍රමිකතා වෙලා. මේ රටේ වැඩකරන ජනතාවගේ මුදල් මෙහෙම හිතුමතේ භාවිතකරන්න බැහැ. 2015 වසරේ බැඳුම්කර ගනුදෙනු සිදුවෙලා තිබෙනවා. වංචා දූෂණ සිදුව තිබෙනවා. ඒ ගැන හොයන්න ඕනෑ. වැරදි කළ අයට දඬුවම් දෙන්න ඕනෑ. හොරකමක් ගැන දැනගන්න කලින් කියන්නේ කොහොමද? ඒ ගැන කලින් කියන්න කලින් නිවැරදි තොරතුරු හොයාගන්න ඕනෑ. අපි කෝප් කමිටුව මගින් මේ ගැන කිව්වා.

ජේ.වී.පී.යේ කවුරු ළඟවත් කළු සල්ලි නැහැ. පක්ෂ අරමුදලෙත් නෑ. අවශ්‍ය නම් ගිණුම් පරීක්ෂා කර බලන්න. ආදායම් මෙන්ම වියදම් කරන ආකාරයත් බලන්න පුලුවන්. ඔය සමහරු නගන චෝදනා අපි පිළිගන්නේ නෑ.

රජය විශ්‍රාම වැටුප් වැඩිකරනවා කිව්වට තවම දුන්නේ නැහැ. මුදල් නෑ කියනවා. ආණ්ඩුවේ බලය මදි කියනවා. මේවා බොරු කතා. පරිපූරක ඇස්තමේන්තුවවත් පාර්ලිමේන්තුවට ඉදිරිපත් කරලා අවශ්‍ය මුදල් ගන්න ආණ්ඩුවට බැරිකමක් නෑ. රටේ වැටුප් විෂමතාවයක් තිබෙනවා. එය විසඳන්න අවශ්‍යයි'' යැයිද කීය.