කේන්ද්‍රයක මධ්‍යයේ ඇති ලග්න කොටුව වටා තවත් කොටු 12ක් පවතින බව කවුරුත් දන්නා කරුණකි. මෙම කොටු ජ්‍යොතිෂයේදී භාව වශයෙන් හඳුන්වනු ලැබේ. ශුභ භාව මෙන්ම අශුභ භාවද මෙම කොටු 12ට ඇතුළත් වේ. ලග්න භාවයේ සිට එනම් ලග්නයට ඉහළින් ඇති කොටුව අංක 1 වශයෙන් ගෙන වම් අග දෙසට ගැනගෙන යාමේදී 6,8,12 යන භාවයන් අශුභ ලෙස සැලකේ. ඒවා හඳුන්වන්නේ දුෂ්‍ඨස්ථාන යනුවෙනි.   

අශුභස්ථාන ලෙස නම් කළ ද මෙම භාව ඇසුරින්ද රාජයෝග හා සමාන ඉතා ශුභඵල දෙන යෝග නිර්මාණය වේ. 6,8,12 භාවාධිපති ග්‍රහයන් කුමන ආකාරයකින් හෝ එම භාවයන්හිම සිටීනම් එම කේන්ද්‍ර හිමියාට විපරීත රාජයෝගයක හිමිකම ලැබේ. ඒ පිළිබඳව විස්තර දැක්වීමට පෙර එක් එක් ලග්නයට අනුව 6,8,12 අධිපතියන් කවුරුන්දැයි දැන සිටීම සුදුසු වේ.   

මේෂ - බුධ, කුජ, ගුරු   
වෘෂභ - සිකුරු, ගුරු, කුජ   
මිථුන - කුජ, ශනි, සිකුරු   
කටක - ගුරු, ශනි, බුධ   
සිංහ - ශනි, ගුරු, සඳු   
කන්‍යා - ශනි, කුජ, රවි   
තුලා - ගුරු, සිකුරු, බුධ   
වෘශ්චික - කුජ, බුධ, සිකුරු   
ධනු - සිකුරු, සඳු, කුජ   
මකර - බුධ, රවි, ගුරු   
කුම්භ - සඳු, බුධ, ශනි   
මීන - රවි, සිකුරු, ශනි   

ඉහත සටහනට අනුව පෙනී යන විශේෂ කරුණක් වන්නේ අශුභ භාව අශ්‍රිතව මෙන්ම ජ්‍යොතිෂයේදී අශුභයයි (පාපී) සැලකෙන රවි, ශනි, කුජ යන ග්‍රහයින්ද මෙම යෝග සඳහා දායක වන බවයි.   

අදාළ භාවධිපතියන් තනිව හෝ දෙදෙනකු සමග හෝ තිදෙනාම එක්ව හෝ 6,8, 12 යන එම භාවයන්හිම තැන්පත් වන අාකාර 3ක් අනුව මෙම යෝග යෙදේ. ඒවා හඳුන්වන්නේ හර්ෂ, සරලා, සහ විමල යනුවෙනි.   
6 වැන්නාධිපති 6 වැන්නේම හෝ 8 හෝ 12 යන ස්ථානයක සිටීම හර්ෂ යෝගයයි. උදාහරණ ලෙස මේෂ ලග්නය ගතහෝත් එහි 6 අධිපති වන බුධ ග්‍රහයා 6 වැන්නේම හෝ 8 හෝ 12 සිටීමයි. හර්ෂ යෝගයෙන් උපන් තැනැත්තා නි​ෙරා්ගී අයෙක් වේ. රෝග අඩුය. කීර්තිය ලැබීමට වාසනාවන්තයෙක් වේ. සතුරු කරද අඩුය. එසේ වන්නේ ඔවුන් කොටගෙන සිටිය හැකි බැවිනි.   

සරලා යෝගය ලෙස හඳුන්වන්නේ 8 වැන්න අධිපතියා 8 වැන්නේම හෝ 6 හෝ 12 හේ සිටීමයි. උදාහරණ ලෙස කටක ලග්න හිමියෙකුගේ 8 වැන්න අධිපති ශනි ඉහත පරිදි සිටීමය. මෙම යෝග හිමියා ධනය බලය ලැබීමට වාසනාව ලබයි. නිර්භීත ගත පැවතුම් වලින් යුතු වේ. මෙම යෝගයේදී 8 අධිපතියා 8ට සිටීම අනුව විවාහ දායාද හිමිකම අන්තිම කැමති පත්‍ර වැනි දෙයින් අනපේක්ෂිත ආකාරයෙන් දේපළ ලාභ හිමිවීම, රජයෙන් නිවාස දේපළ හිමිවීම වැනි ශුභඵල ගෙනදෙයි.   

 12 වැන්නාධිපති 12 හෝ 6 හෝ 8 හෝ සිටීම විමල යෝගය ලෙස හැඳින්වේ. උදාහරණ ලෙස මකර ලග්නය ගතහොත් එහි 12 අධිපති ගුරු ග්‍රහයා 6,8, 12 යන ස්ථානයක සිටීමයි. අරපිරිමැසුම්දායක අයෙක් වේ. හොද ගතිගුණ පෙන්නුම් කරයි. ඒඅනුව ජනප්‍රසාදයට පත් වේ. ස්වාධීනව සිතා ක්‍රියාකොට දියුණු වේ.   

ඉහත කී යෝග 3 විපරීත රාජයෝග ලෙස සැලකුණද නියම වශයෙන්ම විපරීත රාජයෝගය වනුයේ අදාළ ස්ථාන 3හි අධිපති ග්‍රහයින් තිදෙනාම 6,8,12 යන එක් ස්ථානයක සංයෝග වී සිටීමෙනි. උදාහරණ ලෙස මිථුන ලග්න හිමියාගේ 6,8,12 යන භාව අධිපතියන් තිදෙනා වන කුජ, ශනි, සිකුරු මෙම භාව 3න් එකක එක්ව එනම් ත්‍රීග්‍රහ සංයෝගයක් ලෙස සිටීමයි. ඉහතින් දක්වන ලද උදාහරණ තම තමන්ගේ ලග්නවලට හිමි 6,8,12 අධිපතියන්ට අනුව ගළපා ගත යුතු බව සැලකිය යුතුය.   

මෙම ත්‍රීග්‍රහ සංයෝගයෙන් සැදුම්ලත් විපරීත රාජයෝග ලාභියා ආයතනයේ ගමේ ප්‍රදේශයේ කුමන ආකාරයකින් හෝ ප්‍රධානත්වයක් හිමිවීමට සුදුස්සකු වේ.   

එහෙත් මෙම යෝගයක් තිබු පමණින්ම ශුභඵල ප්‍රකාශ කිරීමට පෙර සැලකිය යුතු විශේෂ කරුණක් ද ඇත. එනම් මෙම යෝගයේ ඵල අවම කිරීමට හෝ මුළුමනින්ම විනාශ කිරීමට තුඩුදෙන ග්‍රහ පිහිටීම පිළිබඳව විමසා බැලීමයි. මෙවැනි බාධක අවස්ථාවන්ගෙන් ප්‍රධාන කරුණු කිහිපයක් වනුයේ කේන්ද්‍රයක බාධක ග්‍රහයා 22 වන දෙර්කාණාධිපතියා 64 වන නවාංශකධිපතියා මෙම යෝග කාරක ග්‍රහයින් සමග සංයෝග වීමෙන්ම එම ග්‍රහයින්ට දෘෂ්ට හෙළීමෙන්ම සිටින අවස්ථාවන්ය.   

එමෙන්ම අශුභ දශා අතුරු දශා සහ ඒරාෂ්ටක කාල සීමාව තුළදී ද ශුභඵල වලට හානි සිදුවේ. මෙයින් පෙනී්යන්නේ ඕනෑම සුභ යෝගයක් ක්ෂේත්‍රයක පිහිටි පමණින්ම ශුභඵල ලබාදීමට එය හේතුවක් නොවන අවස්ථා පවතින බවයි.   

ගෞරව සම්මානලාභී පාරම්පරික ජ්‍යොතිර්වේදී 
එච්.එම්.ටී.බී. හේරත්   
109, පැරකුම් මාවත, උයන්දන, කුරුණෑගල.