(රංජිත් රාජපක්ෂ)
 
හැටන් දික්ඔය නගර සභා සීමාවේ දිනපතා එකතු වන කසළ ටොන් ගණනින් නගර සභා සේවකයින් කාසල්රී ජලාශයට මුදා හරින බවද එම ස්ථානවලින් දැඩි දුර්ගන්ධයක් හැමීම හේතුවෙන් තමන් අසීරුතාවයට පත්ව සිටින බවද ප්‍රදේශවාසීහු පවසති.
 
හැටන් දික්ඔය නගර සීමාවේ එකතු වන කසළ දිනපතා එක්රැස් කර හැටන් නගර මධ්‍යයේ ස්ථාන කිහිපයකම ගොඩ ගසා, පසුව නගර සභා සේවකයින් කසළ බැහැර කරන රථවලින් ගෙන ගොස් කාසල්රි ජලාශයට ජලය ගලා බස්නා දික්ඔය ඇළ මාර්ගයට සහ කාසල්රි ජල පෝෂක ප්‍රදේශයට මුදා හරින බව ප්‍රදේශවාසීහු කියති.
 
හැටන් බගවන්තලාව ප්‍රධාන මාර්ගයේ වනරාජා වත්ත ප්‍රදේශයේ සහ දික්ඔය සිංහල විදුහල ඉදිරිපිට මෙසේ කසළ බැහැර කර තිබේ. එම ස්ථානවල කසළ බැහැර නොකරන්නැයි දැන්වීම් පුවරු ද සවිකර ඇතත් අලුයම් කාලයේ නගර සභාවේ රථ වාහනවල පටවා කසළ ඉතා සුක්ෂමව බැහැර කරන බව ඔවුහු කියති. ඔවුන් කසළ බැහැර කරන ආකාරය එක්තරා රථයක තිබූ කැමරාවකද සටහන්ව ඇත.
 
මෙම ගැටළුව සම්බන්ධයෙන් අප හැටන් දික්ඔය නගර සභාවේ ලේකම් එස්.සරවනභවන් මහතාගෙන් විමසීමේදී ඔහු කියාසිටියේ නගර සභාව එවැනි පරිසර විනාශයක් නොකරන බවයි. කසළ බැහැර කරන අයුරු දැක්වෙන වීඩියෝ දර්ශන පෙන්වීමෙන් අනතුරුව එම නිලධාරීන්ට සහ සේවකයන්ට එරෙහිව විනය ක්‍රියාමාර්ගයක් ගන්නා බව ලේකම්වරයා පැවසීය.