(ඩී.ජි.සුගතපාල)
සංචාරක මධ්‍යස්ථානයක් පවත්වාගෙන යන මුවාවෙන් හික්කඩුව තිරාණගම දෙමහල් නිවසක පවත්වාගෙන ගිය සූදු පොලක් වටලා සුදූ කෙලිමින්  සිටි පුද්ගලයින් 7 දෙනෙකු අත් අඩංගුවට ගත් බව ගාල්ල කොට්ඨාස දූෂණ මර්ධන අංශය පවසයි.
 
දුරකතන ඇමතුම්දි කලින් වේලාව වෙන්කරගෙන වාහනවලින් පැමිණෙන අය පමණක් මෙම සුදු පොලට ඇතුලත් කර ගන්නා අතර නිවස වටා අඩි 15ක් පමණ උස තාප්පයක්ද ගේට්ටුවක්ද ඉදිකර තිබිම නිසා වෙනත් බාහිර පුද්ගලයින්ට කිසිසේත්ම ඇතුලුවිමට නොහැකිවි ඇත.
 
මේ පිළිබඳව පොලිසියට ලැබුණ තොරතුරු අනුව දූෂණ මර්දන අංශයේ නිලධාරින් ලොරියක් ගෙන රියදුරු ලෙස පොලිස් කොස්තාපලවරයෙක්ද ඔහුගේ පෙම්වතිය ලෙස පොලිස් කාන්තාවක්ද ඉදිරිපස අසුනේ හිඳුවා පොලිස් නිලධාරින් ලොරියේ පිටුපස සැඟව මෙම නිවස ඉදිරිපිට ගේට්ටුව අසලට ගොස් නවතා ඇත.
ටික වේලාවකදි නිවසේ සිට පැමිණි පුද්ගලයෙකු ලොරිය අසලට පැමිණ බලා ගොස් පෙම්වතුන් යුවලක් සිටින බවත් සැකයක් නොමැති බවත් සුදු පිටියේ අයිතිකරුට පවසා ඇත.මේ අතර සුදු පොලට ඇතුලුවිම සඳහා පුද්ගලයෙකු පැමිණ මෝටර් රථය ගේට්ටුව අසල නතර කල අවස්ථාවේ නිවසේ උඩු මහලේ සිට බැලු පුද්ගලයෙකු ගේට්ටුව විවෘත කරන ලෙස ගේට්ටුකරුට දන්වා ඇත.

 ඒ අනුව ගේට්ටුව විවෘත කරනවාත් සමගම ලොරියද ඇතුලුකර එක් වරම එහි සැඟව සිටි පොලිස් නිලධාරින් සුදු පිටියේ සිටි පිරිස අන්ද මන්ද කරමින්  සුදු පිටිය වටලා හත් දෙනෙකු අත් අඩංගුවට ගෙන ඇත.ඒ වනවිට රුපියල් ලක්ෂ ගණනක් දිනාගත් තිදෙනෙකු එම ස්ථානයෙන් පිටව ගොස් තිබින.
 
අත් අඩංගුවට ගෙන ඇත්තේ හික්කඩුව.රත්ගම, අම්බලන්ගොඩ, මිටියාගොඩ,තෙල්වත්ත ප්‍රදේශවල පදිංචිකරුවන් හත් දෙනෙකි.පරික්ෂණවලදි අනාවරණයවි ඇත්තේ ඔවුන් රැකියාවට සුදු ක්‍රිඩාවේ යෙදෙන පිරිසක් බවය.
 
සැකකරුවන් ගාල්ල මහේස්ත්‍රාත් අධිකරණයට ඉදිරිපත් කිරිමට නියමිතය.