සිංගප්පූරුවේ බෞද්ධ දායකයන්ගෙන් ගෝණකුඹුරේ ජනතාවට ආධාර
(අජිත්ලාල් ශාන්තඋදය)
කොරෝනා වසංගත තත්ත්වය හේතුවෙන් පනවා ඇති සීමා නිසා පීඩාවට පත්වූ රත්නපුර ගෝණකුඹුර ශ‍්‍රී විමලකිත්තියාම විහාරස්ථානය අවට වැසියන්ට සිංගපූරුවේ පදිංචි බෞද්ධ දායකයින් විසින් ලබාදුන් වියළි ආහාර ද්‍රව්‍ය බෙදා දීම අද (21) එම විහාරස්ථානයේ දි සිදුවිය.
රුපියල් එකොලොස් ලක්‍ෂ පනස් දහසක වටිනාකමින් පුත් සහල් සහ පරිප්පු මෙලෙස බෙදා දෙනු ලැබුවේ එම විහාරාධිපති ජාතික ළදරු අධ්‍යාපන හා පොදුසේවා පදනමේ අධ්‍යක්‍ෂ ජනරාල් කැළණියේ කස්සප හිමියන් විසිනි.
මුල් අදියර ලෙස පවුල් දහසක් වෙත මෙම වියළි ආහාර බෙදාදීම සිදුවිය. කොරෝනා වෛරස් ආපදාවෙන් බැට කෑ විහාරස්ථානය අවට ගම්වල ජනතාවට මහවැසි නිසාද විශාල පීඩාවක් ඇතිවූ බව කැළණියේ කස්සප හිමියෝ මෙහිදී පැවසූහ.
‘සිංගපූරුවේ ඉන්න බෞද්ධ පරිත්‍යාගශින් පිංවතුන් සහල් කිලෝ දහදාහක් විහාරස්ථානය අවට වැසියන්ට බෙදා දෙන්න කියලා ලබාදුන්නා. විහාරස්ථානවල වැඩ වාසය කරන භික්‍ෂුන් වහන්සේලාට ගමේ දායකයෝ පුලූවන් විදියට දානමාන දෙමින් රැක බලා ගන්නවා. දායකයින්ට විපතක් හානියක් වුණාම විහාරස්ථානයේ හාමුදුරුවරු හොයලා බලලා පුලූවන් විදියට උපකාර කරන්න ඕනෑ. ඒක තමයි බුදු දහමේ ඉගැන්වීම.’
‘බොහෝ හාමුදුරුවරුවගේම බෞද්ධ පිංවතුන් රටපුරා විපතට පත්වූවන්ට උදව් කළා. දන් දුන්නා. කොටි ගණන් අනවශ්‍ය දේට වියදම් කරන සමහර දානපති පිංවතුන් වගේම විශාල ආදායම් තියන විහාරස්ථාන වලින් තවම පීඩාවට පත්වු ජනතාවට සේවයක් වුණේ නෑ. අයත් සොයලා බලලා උදව් කරාවි කියලා හිතනවා’ යැයිද කැළණියේ කස්සප හිමියෝ පැවසූහ.
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
