(ක.ග.කරුණාරත්න)
මින්නේරිය සහ ගිරිතලේ මහ වැව් යටතේ වී වගා කරන කුඹුරුවලට මාස් කන්නයේ වගාව සඳහා ජලය නිකුත් කිරීම මේ මස 25 වෙනි දින සිට ආරම්භ කිරීමට අද (11) පැවැති කන්න රැස්වීම්වලදී තීරණය විය.
මේ වැව් යටතේ වගා කෙරෙන කුඹුරු බිම් ප‍්‍රමාණය අක්කර 30,000 ඉක්මවයි.
පොලොන්නරුව දිස්ත‍්‍රික් ලේකම් පණ්ඩුක අබේවර්ධන මහතාගේ ප‍්‍රධානත්වයෙන් ඒ වැව්වලට අයත් ව්‍යාපාර කළමනාකරණ කාර්යාලවලදී මේ රැස්වීම් පැවැත්විණි.
කවුඩුල්ල ජලාශය යටතේ ජලය නිකුත් කිරීම ආරම්භ කරන දිනය පිළිබඳව අද පැවැති කන්න රැස්වීමේදී තීරණය නොවූ අතර ඒ සඳහා මේ මස 25 වෙනි දින නැවත කන්න රැස්වීමක් පැවැත්වීමට දිස්ත‍්‍රික් ලේකම්වරයා,වාරි නිලධාරීහු සහ ගොවි නියෝජිතයෝ එකඟතාවකට පැමිණියහ.
කවුඩුල්ල ජලාශයේ දැනට තිබෙනුයේ අක්කර අඩි 20,000ක පමණ අඩු ජල මට්ටමක් බවත් එය අක්කර අඩි 40,000ක් ඉක්මවන මට්ටමට මොරගහකන්ද ජලාශයෙන් ජලය ලබා ගැනීමෙන් පසුව මාස්කන්නයේ වී වගාවට ජලය නිකුත් කිරීමට හැකියාව ලැබෙන බව පොලොන්නරුව කලාපය භාර වාරිමාර්ග අධ්‍යක්‍ෂ එස්.කේ.හේවාගම මහතා ප‍්‍රකාශ කළේය.
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
