(බිඟුන් මේනක ගමගේ) 


පැවැති රජයේ හිටපු ඇමැතිවරුන්ගේ සාමාන්‍ය ක්‍රියාපටිපාටියෙන් බැහැර ගනුදෙනුවල තොරතුරු ඇතුළත් රාජපක්ෂ මහතා කර ඇති ප්‍රකාශය සත්‍යයෙන් තොර යැයි එක්සත් ජාතික පක්ෂ මහලේකම් අකිල විරාජ් කාරියවසම් මහතා අද (22) පැවසීය.

අගමැති මහින්ද රාජපක්ෂ මහතාගේ ප්‍රකාශය තනිකරම ගේම් එකක් යැයි ද එක්සත් ජාතික පක්ෂය නව රජය සමඟ ඩීල් දමන බවට ජනතාවට ඒත්තු ගැන්වීමේ වුවමනාවෙන් කරන ලද එකක් යැයි ද කාරියවසම් මහතා චෝදනා කළේය.

සිදුවන ඇතැම් දේවල් කුමන්ත්‍රණ යැයි එක්සත් ජාතික පක්ෂයේම අඳබාල පිරිස් ද චෝදනා කර තිබෙනු තමා දුටුවේ යැයි කී හෙතෙම සිය පහත් දේශපාලන න්‍යාය පත්‍ර ක්‍රියාවට නැගීමට එක්සත් ජාතික පක්ෂය ඉලක්ක කරගැනීම කනගාටුවට කරුණක් බව අවධාරණය කර කීය.

‘ලංකාදීප’ සඳුදා හමුව දේශපාලන සාකච්ඡාවේදී නැගූ ප්‍රශ්නයකට පිළිතුරු වශයෙන් කාරියවසම් මහතා මේ බව කීය.

එක්සත් ජාතික පක්ෂ මහලේකම් අකිල විරාජ් කාරියවසම් මහතා මෙසේ ද කීය. 

“ඔය ෆයිල් කතාවම ගේම් එකක්නෙ. පැහැදිලවම පේනවා මේ පටලවන්නයි හදන්නේ කියලා. යූ.එන්.පී එක ඩීල් එකක් දාන්න හදනවා කියලා පටලන්නනේ එයාලට ඕනෑ. මේ හැම දෙයක්ම එජාපයේ කුමන්ත්‍රණ යැයි අපෙත් සමහර අඳබාලයෝ කියලා තිබෙනවා මම දැක්කා. තමන්ගේ පහත් දේශපාලන න්‍යාය පත්‍ර ක්‍රියාවට නගන්න සමහරු එජාපයට චෝදනා කරනවා.” 

“ඔය වගේ දේවල් නෙවෙයි. ඇත්තටම ගත්තොත් මේ කැබිනට් මණ්ඩලයේ ඉන්න බොහෝ දෙනා සිරගත විය යුතු අයයි. අපි ඒ සිදුවීම් නීතියට බාරදුන්නා විනා මේ වගේ අතගැසීම් කළේ නෑනෙ. හොරු මංකොල්ලකාරයෝ ඔක්කොම අපේ කාලයේ බේරිලා ගියා කියලයි මටත් හිතෙන්නේ.

විවිධ ආකාරවලට ඒවා බේරාගත්තා කියලත් අපට පේනවා. පොලිස් දෙපාර්තමේන්තුව, එෆ්.සී.අයි.ඩී, අධිකරණය වෙන්න පුළුවන්. අපි කොච්චර නිදහස දී තිබුණත් ඒවා හරියාකාරව ක්‍රියාත්මක වුණාද කියලා ජනතාවගෙන් අහන්න අපි කැමැතියි. ”