(*** කිරිඳිවැල උපාලි රණවීර)

‘‘ශ්‍රී ලංකාවේ ප්‍රජාතන්ත්‍රවාදයට මැර ප්‍රහාරයක් එල්ල කරමින් වර්තමාන ආණ්ඩුව 20 වැනි ව්‍යවස්ථා සංශෝධනය ගෙන ඒමට කටයුතු කරනවා. රාජපක්ෂ පවුලේ පැවැත්මට මෙවැනි සංශෝධනයක් ගෙන ඒමට තුනෙන් දෙකක බලයක් ජනතාව දුන්නාද? ද්විත්ව පුරවැසිභාවය එලෙසම තබා ගැනීමට පාර්ලිමේන්තුවට පිවිසීම අරමුණු කර ගෙන බැසිල් රාජපක්ෂ මහතාගේ අත්‍යවශ්‍යතාව ඉටුකර ගැනීමට රටේ ව්‍යවස්ථාව අද ඉදිරියට ගෙනවිත් තිබෙනවා. මෙහි භයානක බව ජනතාව දැන්වත් තේරුම් ගෙන කටයුතු කළ යුතු යැයි’’ ගම්පහ දිස්ත්‍රික් පාර්ලිමේන්තු මන්ත්‍රී හර්ෂණ රාජකරුණා මහතා කීවේය.

කිරිඳිවැල- මිල්ලතේ ‘සිරිසඳ භවනේ’ දී මාධ්‍ය හමුවක් පවත්වමින් රාජකරුණා මහතා මෙසේ සඳහන් කළේය.

හර්ෂණ රාජකරුණා මහතා මෙසේ ද ප්‍රකාශ කළේය.

‘‘එකම පවුලේ සාමාජිකයකුගේ අවශ්‍යතාව, අපේක්ෂාව නිසා මුළු දිවයිනටම බලපාන ව්‍යවස්ථාව වෙනස් කිරීමට කටයුතු කිරීමෙන් රජය කරන්නේ බරපතළ වරදක්. ලෝකයේ නන් දෙසින් මෙයට විරෝධය පළවූ විට ඇතිවන ගැටලු නොදන්නා නිසා ජනතාව ව්‍යවස්ථා වෙනසට සහාය දුන්නා හැර ඊට ප්‍රථම සංශෝධනයෙන් පසු එක් කරන කරුණු කුමක්ද යන්න දැන සිටියේ නැහැ. ඔවුන් ඒ බව දැන සිටියා නම් ප්‍රතිඵලය මීට වඩා වෙනස් වන්නට ඉඩ තිබුණා.

නව ව්‍යවස්ථා සංශෝධනය තුළින් ස්වාධීන කොමිසන් සභා බලතල ජනාධිපති යටතට පවරා ගන්නවා. අනාගතයේ දී ස්වාධීන අධිකරණයක්, ස්වාධීන පොලිස් සේවාවක් ඇතුළු රාජ්‍ය සේවාවල ස්වාධීනත්වයට කුමකින් කුමක් වේදැයි දැන්වත් ජනතාව අවබෝධ කරගත යුතුයි.

19වැනි ව්‍යවස්ථා සංශෝධනය ශ්‍රී ලංකා නිදහස් පක්ෂය හා එක්සත් ජාතික පක්ෂය එකමුතුව කළ දෙයයි. නමුත් 20වැනි සංශෝධනයට සමගි ජන බලවේගයේ සිටින අප පක්ෂයේ නායක සජිත් ප්‍රේමදාස මහතා සමග එක්ව විරෝධය පලකරනවා.

අපේ රටේ අනාගත අභිවෘද්ධිය උදෙසා වැඩ කිරීමට අපේක්ෂාව, බලාපොරොත්තුව ජනතාව වෙනුවෙන් තිබේ නම් රටේ පුරවැසිභාවය අවලංගු කරගෙන දේශපාලනයට එක්ව කටයුතු කිරීමට නොහැකි ඇයි?

ව්‍යව්‍යස්ථා සංශෝධනයට ඡන්දය විමසීමේදී එය පරාජය කිරීමට ගත හැකි සියලු‍ම ක්‍රියාමාර්ග එකමුතුව කරනවා යයි ද කීය.