(මනෝප්‍රිය ගුණසේකර)

 
කෝට්ටේ නගර සභාවේ හිටපු නියෝජ්‍ය නගරාධිපතිවරයාගේ පරිගණකයේ තිබූ දත්ත නීතීවිරෝධී ආකාරයෙන් ලබාගැනීමේ චෝදනාවට තමන් නිවැරදිකරුවන් බව කෝට්ටේ නගර සභාවේ හිටපු නගරාධිපති, ජනාධිපති පෞද්ගලික ලේකම් ජනක රණවක මහතා සහ කෝට්ටේ නගර සභාවේ හිටපු පරිගණක ක්‍රියාකරුවකු කොළඹ මහාධිකරණ විනිසුරු මංජුල තිලකරත්න මහතා හමුවේ අද (09) පැවසුහ.

                    
විත්තිකරුවන්ට එරෙහි අධිචෝදනා කියවූ අවස්ථාවේදී එම චෝදනාවන්ට තමන් නිවැරදිකරුවන් බව විත්තිකරුවන් පැවසීම නිසා නඩුව විභාග කිරීමට තීරණය කළ විනිසුරුවරයා මෙම නඩුවේ පැමිණිලිකරු වන කෝට්ටේ නගර සභාවේ හිටපු නියෝජ්‍ය නගරාධිපති මධූර විතානගේ මහතාට ලබන මස 28 වැනිදා අධිකරණයේ පෙනී සිටින  ලෙස දැනුම් දෙමින් සිතාසි නිකුත් කළේය. 
                         
2013 ජුනි මස 17 වැනිදා කෝට්ටේදී, කෝට්ටේ නගර සභාවේ නියෝජ්‍ය නගරාධිපතිවරයාගේ නිල කාමරයේ තිබු පරිගණකයේ දත්ත නීත්‍යානූකූල නොවන ආකාරයෙන් ලබාගැනීමට කුමන්ත්‍රණය කිරීම ඒ අනුව අදාළ දත්ත නීත්‍යානූකූල නොවන ආකාරයෙන් ලබාගැනීමට කටයුතු කිරීම හා ඒ සඳහා ආධාර අනුබල දුන් බවට විත්තිකරුවන්ට එරෙහිව නීතීපතිවරයා විසින් චෝදනා නඟා තිබිණි.

මෙලෙස චෝදනා ලැබ සිටින්නේ කෝට්ටේ නගර සභාවේ හිටපු නගරාධිපතිවරයා මෙන්ම ජනාධිපතිවරයාගේ පෞද්ගලික ලේකම් ජනක රණවක මහතා සහ කෝට්ටේ නගර සභාවේ හිටපු පරිගණක ක්‍රියාකරුවකු වන එස්. ලසන්ත නමැත්තෙකි.

මෙම නඩුව කැඳවනු ලැබු අවස්ථාවේදී විත්තිකරුවෝ අධිකරණය හමුවේ පෙනී සිටියහ.

ඒ අවස්ථාවේදී විත්තිකරුවන්ට එරෙහි චෝදනා කියවා දුන් අතර එම චෝදනාවන්ට තමන් නිවැරදිකරුවන් බව විත්තිකරුවෝ අධිකරණය හමුවේ පැවසුහ.

ජනක රණවක මහතා වෙනුවෙන් පෙනී සිටි ජනාධිපති නීතීඥ නලීන් ලද්දුවහෙට්ටි මහතා කරුණු ඉදිරිපත් කරමින් මෙම නඩුවේ නීතීමය කරුණු සම්බන්ධයෙන් මුලික විරෝධතාවයක් ඉදිරිපත් කිරීමට බලාපොරොත්තු වන බවත් මෙම නඩුවට පාදක පරිගණක පරීක්‍ෂා කිරීමට අවශ්‍ය බවත් දැනුම් දුන්නේය.

පැමිණිල්ල වෙනුවෙන් පෙනී සිටි නියෝජ්‍ය සොලිසිටර් ජනරාල් දිලීප පීරිස් මහතා කරුණු ඉදිරිපත් කරමින් විත්තියේ මුලික විරෝධතාවය ඉදිරිපත් කළ පසු ඒ සම්බන්ධයෙන් තීරණයක් ලබාදීම සුදුසු බවත් මෙම නඩුවට පාදක පරිගණක පරීක්‍ෂා කිරීමට අවශ්‍ය පහසුකම් හා සහය ලබාදීමට පැමිණිල්ල සුදානම් බවත් දැනුම් දුන්නේය.