(නිමල කොඩිතුවක්කු)
 
අමාත්‍ය රිෂාද් බදියුදීන් මහතාට අන්තවාදින් සහ ත‍්‍රස්තවාදීන් සමඟ තිබූ සම්බන්ධතා  සහ ඔවුන් ආරක්ෂා කළ ආකාරය පිළිබඳ තොරතුරු මෙන්ම ඔහු ඇමැතිවරයකු ලෙස සිදුකළ  හොරකම්, දුෂණ, මංකොල්ලකෑම්, පිළිබඳ තොරතුරු සියල්ල විශ්වාසභංගයේ දී හෙළි කරන බව පාර්ලිමේන්තු මන්ත‍්‍රී එස් බී දිසානායක මහතා කොළඹදී පැවසීය.

මෙම කරුණු  සම්බන්ධයෙන්  පාර්ලිමේන්තු  තේරීම් කාරක සභාවක් පත්කර රනිල් වික‍්‍රමසිංහ මහතා සහ  එක්සත් ජාතික පක්ෂය ශුද්ධ  පවිත‍්‍ර වීමට දරණ උත්සාහය නින්දිත  එකක් යැයි ද දිසානායක මහතා කියා සිටියේය.

පුංචි බොරැල්ලේ  පිහිටි පාර්ලිමේන්තු මන්ත‍්‍රී තිලංග සුමතිපාල මහතාගේ  නිවසේ පැවැති මාධ්‍ය හමුවකට එක්වෙමින් මන්ත‍්‍රීවරයා මේ බව පැවසීය.

එහිදී වැඩිදුරටත් අදහස් දැක්වූ පාර්ලිමේන්තු මන්ත‍්‍රී එස් බී දිසානායක මහතා මෙසේ ද කීවේය.

‘‘මංගල සමරවීර මුදල් අමාත්‍යවරයා චීවරධාරීන් කියමින් ගෞරවණීය  ස්වාමීන් වහන්සේට අපහාස කරන ගමන්  මේක සිංහල බෞද්ධ රටක් නොවන බව නැවත නැවත ප‍්‍රකාශ කරමින්  මේ රටේ කිසිදු අන්‍යආගමිකයෙක් නොකියන විකෘති කතාවක් කියනවා.

ථේරවාදී බුදුදහමේ  මූලස්ථානය ශ්‍රී ලංකාව බවට අද විදේශීය රටවල් පවා පිළිගන්නවා. කාදිනල්තුමන් පවා මේ ගැන සඳහන් කළා. එහෙම කියද්දි තමයි  මංගල සමරවීර මහතා මෙවැනි ප‍්‍රකාශයක් කරන්නේ.

ලංකාවේ ප‍්‍රධාන මුස්ලිම් පල්ලි වන මහනුවර  අස්ගිරි මුස්ලිම් පල්ලිය, උඩුනුවර මුස්ලිම් මහ පල්ලිය, ගම්පොල  මුස්ලිම් මහ පල්ලිය, කුරුණෑගල මුස්ලිම් මහ පල්ලිය කියන මේ සියල්ල හදලා තියෙන්නේ අස්ගිරි විහාරයට, මල්වතු විහාරයට, රිදි විහාරයට අයත් ඉඩම්වලයි.  කවදත් මිත‍්‍ර ලීලාවෙන්  සහෝදර ලීලුවෙන් මේ සියලු ආගමිකයන් ජාතිකයන්  එක්ව ජීවත් වෙන්න  ඕන කියන සංස්කෘතිය අපෙන් පැවත එනවා.

අවාසනාවකට මංගල සමරවීරට මේක තේරෙන්නේ නැහැ. ඔහුට  අවශ්‍ය වෙලා තියෙන්නේ සිංහල බෞද්ධ  ජනතාව ප‍්‍රකෝප කිරීමටයි. 

මේ වනවිට බොදුබල සේනා සංවිධානයේ මහලේකම් ඥාණසාර හිමියන් නිදහස් කිරිමට අදාළ තීන්දුව ජනාධිපතිවරයා ගෙන තියෙනවා. ඒ කළ උතුම් කාර්ය වෙනුවෙන් ජනාධිපතිවරයාට  අපේ විශේෂ ගෞරවය සහ ස්තූතිය පුදකරනවා."