(ශාන්ත ප්‍රදීප් කුමාර කුලරත්න)

අතුරුගිරිය හෝකන්දර හොරහේන ප්‍රදේශයේ නිවසක පිය පුතු දෙපළක් අතර ඇති වූ බහින්බස් වීමක් දුරදිග යාමෙන් පුතා එල්ල කළ මන්න පහරකින් බරපතල තුවාල ලැබූ 62 හැවිරිදි තිදරු පියෙකු හෝමාගම මූලික රෝහලට ඇතුළත් කළබව අතුරුගිරිය පොලිසිය පැවසීය.

පහරකෑමෙන් බරපතල තුවාල ලැබූ පුද්ගලයා ශල්‍යකර්මයක් සඳහා යොමුකළ බව  හෝමාගම මූලික රෝහලේ ප්‍රකාශකයෙකු පැවසීය.

වෘත්තියෙන් පෙදරේරුවෙකු වන තුවාලකරු අද (22) සවස  බාල පුතුන් දෙපළ සමඟ නිවසේ රැඳී සිටියදී 23 හැවිරිදි   වැඩිමහල් පුත්‍රයා නිවසට පැමිණ ඇත.

එහිදී පියා සමඟ  ඇතිවූ බහින් බස් වීමක් දුරදිග යාමෙන්  නිවසේ මුළුතැන් ගෙයි තිබූ මන්නයක් ගෙන තම පියාගේ ගෙලට පහරදී බරපතල තුවාල සිදුකර ඇතැයි පොලිසිය පැවසීය.

පහරකෑමෙන් තුවාල ලැබූ පුද්ගලයා ප්‍රතිකාර සඳහා හෝමාගම මූලික රෝහල ඇතුළත් කිරීමෙන් අනතුරුව ශල්‍යකර්මයක් සඳහා යොමු කර තිබේ.

ඒ අනුව සිද්ධියට සම්බන්ධ සැකකරු අත්අඩංගුවට ගැනීම සඳහා පොලිසිය විමර්ශන ආරම්භ කර ඇත.