( +++ අංජුල මහික වීරරත්න සහ සඳුනි කෞශල්‍යා)

‘අලියා’ ලකුණින් තොරව වෙනත් කිසිම ලකුණකින් තමා ඉදිරි මැතිවරණයට තරග කරන්නේ නැතැයි එක්සත් ජාතික පක්ෂ ජාතික සංවිධායක පාර්ලිමේන්තු මන්ත්‍රී නවින් දිසානායක මහතා පැවැසීය.

වතුකරයේ දෙමළ ජනතාව හුරු වී සිටින්නේ ‘අලියා’ ලකුණට ඡන්දය දීමට බැවින් නුවරඑළිය දිස්ත්‍රික්කයෙන් තරග කරන තමා මෙන්ම කේ.කේ. පියදාස මහතා ද අලියා ලකුණින් තරග කිරීමට අවශ්‍යම බවට කෘත්‍යාධිකාරී මණ්‍ඩලයෙන් විශේෂ ඉල්ලීමක් කළේ යැයි ද නවීන් දිසානායක මහතා කීවේය.

එක්සත් ජාතික පාක්ෂිකයන් අනෙක් සියලුම දිස්ත්‍රික්කවලට වෙනත් ලකුණකින් තරග කිරීමට තීරණය කළද නුවරඑළියට ‘අලියා’ම අවශ්‍යයැයි දිසානායක මහතා සඳහන් කළේය.

‘අලියා’ ලකුණ නැතිනම් අනාගතයේ තරග කරනවාද නැද්ද යන කාරණාවද ගැටලුවකැයි දිසානායක මහතා වැඩිදුරටත් කීය.

හදවත වැනි වෙනත් ලකුණකට ජනතාව හුරු කරන්න දැන් කාලයක් නැති බව සඳහන් කළ නවීන් දිසානායක මහතා ‘හදවත’ හාස්‍යජනක ලකුණක් බවද කීවේය. හදවත මේ දිනවල ෆේස්බුක්වල පවා හාස්‍යයට ලක් වෙතැයි ද නවීන් දිසානායක මහතා පැවැසීය.

පිටකේට්ටේ සිරිකොත එක්සත් ජාතික පක්ෂ මූලස්ථානයේදී මාධ්‍ය හමුව පැවැත්විණි.