(හැටන් රංජිත් රාජපක්ෂ)            

කාන්තාවකගේ ගෙල බැඳ තිබූ රුපියල් ලක්ෂ තුන හමාරක් පමණ වටිනා රන්මාලය කඩා ගෙන දිවගිය පුද්ගලයෙක් පොලිසියට අසුවූ අවස්ථාවේදී එම රන් මාලය ගිලදමා තිබේ.

හැටන් තරුණ බෞද්ධ සමිතියට පිවිසෙන මාර්ගයේ ගමන් කරමින් සිටි කාන්තාවකගේ රන් මාලය කඩාගැනීම සම්බන්ධයෙන් හැටන් පොලිසියට ලද පැමිණිල්ලක් මත හැටන් පොලිසියේ අපරාධ විමර්ශන අංශයේ නිලධාරින් වහාම ක්‍රියාත්මක වී හැටන් නගරයේ ස්වර්ණාභරණ උකසට ගන්නා වෙළඳසල් වලින් ඒ පිළිබඳ තොරතුරු විමසා තිබේ. පසුව සැකකරු පිළිබඳව තොරතුරු අනාවරණය කරගත් පොලිස් නිලධාරින් නිලධාරින් විසින් සැකකරු දැඩි පරිශ්‍රමයක් දරා අල්ලාගත් විටදී සැකකරු විසින් ඔහු සන්තකයේ තිබු රන්මාලය ගිලදමා ඇත.

සැකකරු මේ මස (21) දින දක්වා රක්ෂිත බන්ධනාගාර ගත කිරිමට හැටන් මහේස්ත්‍රාත් අධිකරණයේ වැඩ බලන මහේස්ත්‍රාත් දමයන්ති ප්‍රනාන්දු මහත්මිය (08) දින නියෝග කළාය. මෙසේ රක්ෂිත බන්ධනාගාර ගත කරනු ලැබූවේ හැටන් හිජිරාපුර පදිංචි අබ්දුල් මුතාෂ් මොහොමඩ් අලි නැමැති (33) හැවිරිදි යන අයයි.

අත්අඩංගුවට ගත් සැකකරු හැටන් පොලිසියේ නිලධාරින් විසින්  දික්ඔය මූලික රෝහලවෙත ඇතුළත් කර එක්ස්රේ ඡායාරුපයක් ගෙන පරීක්ෂා කර බැලිමේදී එම රන්මාලය සැකකරුගේ උදරයේ රැඳී තිබෙන අයුරු පැහැදිලිව පෙනෙන්නට තිබුණි.

හැටන් මහේස්ත්‍රාත් අධිකරණයේ වැඩ බලන මහේස්ත්‍රාත් දමයන්ති ප්‍රනාන්දු මහත්මිය බන්ධනාගාර නිලධාරින්ට නියෝග කර ඇත්තේ සැකකරු බන්ධනාගාර රෝහලේ වෛද්‍යවරයා වෙත ඉදිරිපත් කර සැකකරුගේ  උදරයේ රැඳී ඇති රන් මාලය පිටතට ගන්නා ලෙසයි.  එම රන්මාලය වැඩිදුර පරීක්ෂණ සඳහා හැටන් පොලිසිය වෙත බාරදී සැකකරු මේ මස (21) දින අධිකරණය වෙත ඉදිරිපත් කරන ලෙසද මහේස්ත්‍රාත් දමයන්ති ප්‍රනාන්දු මහත්මිය නියෝග කළාය.