(ඩයනා උදයංගනී)
 
පාර්ලිමේන්තු මන්ත්‍රීවරුන්ට හිමිවන තීරු බදු රහිත වාහන ආනයන බලපත‍්‍ර 228ක් නිකුත් කර ඇති බවත්, ඒ අනුව පාර්ලිමේන්තුවේ සියලූ දෙනා තීරු බදු රහිත වාහන ආනයන බලපත‍්‍රයෙන් වාහන ලබාගෙන ඇති බවත් සම කැබිනට් ප‍්‍රකාශක, ඉඩම් හා පාර්ලිමේන්තු කටයුතු ඇමති ගයන්ත කරුණාතිලක මහතා අද පැවති කැබිනට් තීරණ දැනුම්දීමේ මාධ්‍ය හමුවේදී පැවසීය.
 
එම අවස්ථාවේදී අදහස් දැක්වූ සම කැබිනට් ප‍්‍රකාශක, සෞඛ්‍ය, පෝෂණ හා දේශීය වෛද්‍ය අමාත්‍ය රාජිත සේනාරත්න මහතා පැවසුවේ අගමැතිවරයා, කතානායකවරයා ඇතුළුව මෙතෙක් වාහන නොගත් පිරිසක් ද සිටින බවයි. 
 
අමාත්‍යවරුන් මේ බව පැවසුවේ  රුපියල අවප‍්‍රමාණය වීම පාලනය කිරීමේ ක‍්‍රමවේදයක් ලෙස පාර්ලිමේන්තු මන්ත‍්‍රීවරුන්ට තීරු බදු රහිත වාහන ආනයන බලපත‍්‍ර නිකුත් කිරීම තාවකාලිකව අත්හිටුවීම ඇතුළු තීරණ කිහිපයක් රජය විසින් ගනු ලැබුවේ සියලූ මන්ත‍්‍රීවරුන් වාහන ලබාගෙන අවසන් වූ පසුව බවටත්, එයින් පහරක් එක්ක කර ඇත්තේ රාජ්‍ය සේවකයින්ට බවටත් නැගෙන චෝදනා සම්බන්ධයෙන් මාධ්‍යවේදියකු නැගූ පැනයකට පිළිතුරු දෙමිනි.
 
එහිදී පළමුව පිළිතුරු ලබාදුන් රාජිත සේනාරත්න මහතා එම බලපත‍්‍රය භාවිතා කළ මෙන්ම නොකළ අය ද සිටින බවත්, තමා තමන්ගේ බලපත‍්‍රය ලබාගත් බවත් කීවේය.
 
එම තීරුබදු සහිත බලපත් හිමි රජයේ සේවකයින්ගෙන් 8000ක් පමණ එය ලබාගෙන ඇතැයි කී රාජිත සේනාරත්න මහතා තවත් හත්දහස් ගණනක් ලබාගැනීමට සිටින බව ද කීවේය.
 
එම අවස්ථාවේදී ගයන්ත කරුණාතිලක මහතාද අදහස් දැක්වීමට එක්වූ අතර ඔහු පැවසුවේ පාර්ලිමේන්තුවේ සියලූ දෙනා බලපත‍්‍රය ලබාගෙන ඇති බවත්, තමන් පාර්ලිමේන්තු කටයුතු ඇමතිවරයා බැවින් ඒ ගැන පැහැදිලිව දන්නා බවත්ය.
 
එසේ වුවත් අමාත්‍යාංශවලට ගෙන ඒමට නියමිතව තිබූ වාහන ගෙන ඒම අවලංගු කර ඇති බව අමාත්‍ය ගයන්ත කරුණාතිලක මහතා සඳහන් කළේය.
 
තමාගේ අමාත්‍යාංශයේද මේ වන විට භාවිතා වන්නේ කෙහෙළිය රඹුක්වැල්ල ඇමතිවරයාගේ සමයේ අමාත්‍යාංශයට ලබාගත් වාහන බව ද ගයන්ත කරුණාතිලක මහතා  කීවේය.