ශාන්ත ප්‍රදීප් කුමාර කුලරත්න

රුපියල් 5000 දීමනාව ලබාගැනීම සඳහා හෝමාගම හත්ලහගොඩ  විහාරස්ථානයට ගොස් සිටි තිදරු පියෙකු අද (31) හදිසියේ  මිය ගොස් ඇතැයි කහතුඩුව පොලිසිය පවසයි .

මෙසේ මියගොස් ඇත්තේ හෝමාගම , මාගම්මන පදිංචි , කරුණාසිරි ගුණරත්න සිල්වා නම් ඇති  (68) හිටපු ලිපිකරුවකු බව පොලිසිය කියයි.

මෙම පුද්ගලයා අද(31)දා උදෑසන හත්ලහගොඩ විහාරස්ථානයට පැමිණ ඇත්තේ රජය මගින් ලබාදෙන රුපියල්   5000 දීමනාව ලබාගැනීම සඳහාය.

ඒ සඳහා පැමිණීමට නියමිත පෝලිමේ පිටුපස රැඳී සිටිය දී කිසියම් අපහසුතාවයකින් රැඳී සිට ඇති අතර ඒ බව  එහි සිටි තවත් පුද්ගලයකු දැ ක මොහුව ඉදිරියෙන් තබා තිබූ පුටුවක හිඳුවා ඇති අතර ඒ සමඟම රෝගී තත්ත්වය  උත්සන්න වීම  නිසා  1990 ගිලන් රථයකට ඇමතුමක් ලබාදී ඇතැයි පොලිසිය පවසයි .

ඒ අනුව සුව සැරිය ගිලන් රථයක් එම ස්ථානයට පැමිණ ඇති  අතර එහිදී රෝගියා පරීක්ෂා කොට ඔහු මිය ගොස් ඇති බව පවසා ඇතැයි පොලිසිය
පවසයි.

ඒ අනුව හදිසි මරණ පරීක්ෂක සාම විනිසුරු පාරින්ද කොටුගොඩ මහතාට සිද්ධිය දැනුම් දීමෙන් පසුව ඔහු එම ස්ථානයට පැමිණ  ස්ථානීය පරීක්ෂණයක් සිදු කොට පශ්චාත් මරණ පරීක්ෂණය සඳහා දේහය කළුබෝවිල ශික්ෂණ රෝහලට රැගෙන යන ලෙස පොලිසියට නියෝග කළේ ය .

ඒ අනුව  දේහය කළුබෝවිල ශික්ෂණ රෝහලේ මෘත ශරීරාගාරයට රැගෙන ගිය බවත් කළුබෝවිල ශික්ෂණ රෝහලේ හදිසි මරණ පරීක්ෂක සාම විනිසුරු පාරින්ද කොටුගොඩ මහතා විසින් කළුබෝවිල හදිසි මරණ පරීක්ෂක අධිකරණයේදී අද 31 දා පශ්චාත් මරණ පරීක්ෂණය සිදුකිරීමට නියමිතව තිබුණි .

සිද්ධිය පිළිබඳව කහතුඩුව පොලිස් ස්ථානාධිපති ප්‍රධාන පොලිස් පරීක්ෂක තුසිත  වික්‍රමරත්න මහතාගේ උපදෙස් මත පො.සැ (56800) සෝමරත්න නිලධාරීහු පරීක්ෂණ පවත්වති.