(තිලකරත්න දිසානායක)

ගම්පහ සෞඛ්‍ය වෛද්‍ය නිලධාරී කොට්ඨාසයට අයත් මෝරුපොල ප්‍රදේශයේදී ඉකුත් 3 වෙනි දින ලේ පරිත්‍යාග කිරීමේ වැඩසටහනකදී, ලේ පරිත්‍යාග කළ කිහිපදෙනෙකුම කොවිඩ් -19 වයිරසය ආසාදිතයින් බවට තහවුරුවී තිබේ.

එබැවින් එම රුධිර ප්‍රමාණය ඉවත් කරන්නැයි දැනුම් දීමට පියවර ගත් බව ගම්පහ සෞඛ්‍ය වෛද්‍ය නිලධාරී සුභාෂ් සුභසිංහ මහතා පැවසීය.

මෙම ලේ පරිත්‍යාග කිරීමේ වැඩසටහන ගම්පහ සෞඛ්‍ය  වෛද්‍ය නිලධාරී කාර්යාලය හෝ ප්‍රදේශය බාර මහජන සෞඛ්‍ය පරීක්ෂකවරයා හෝ දැනුවත් නොකර පවත්වා ඇත.

ලේ පරිත්‍යාග කළ අය අතරින්  එකම පවුලේ තිදෙනෙකු ඇතුලු 4දෙනෙකු කොවිඩ් -19 ආසාදිතයින් බව තහවුරුවීම  මත එම ප්‍රදේශයේ පවුල් 19 ක සාමාජිකයින් 100 දෙනෙකු පමණ ස්වයං නිරෝධායනයට ලක් කිරීමට පියවර ගෙන ඇති බව මෝරුපොල ප්‍රදේශය බාර  මහජන සෞඛ්‍ය පරීක්ෂක සුසන්ත බණ්ඩාර මහතා සදහන් කළේය.

එම වැඩසටහනට සහභාගි වී ඇති විදුලි බල මණ්ඩලයේ සේවය කරනු ලබන අයෙකුට සහ වරාය අධිකාරියෙහි සේවය කරන අයෙකුට හා ඔහුගේ බිරිදටත් , සොහොයුරාටත් වයිරසය ආසාදනය වී ඇති බවත් මහජන සෞඛ්‍ය පරීක්ෂකවරයා  පැවසීය.

ආසාදිතයෙකුව සිටින විදුලි බල මණ්ඩලයේ සේවය කරනු ලබන තැනැත්තාගේ පියා බස් රියදුරෙකු ලෙස මාතර - කොළඹ බස් රථයක සේවය කරන අයෙකු බවද අනාවරණය වී ඇති බව සදහන් කළ මහජන සෞඛ්‍ය පරීක්ෂකවරයා ඔහුද පී.සී.ආර් පරීක්ෂණයට භාජනය කිරීමට පියවර ගන්නා බවද කීය.

ඉකුත් 3 වෙනි දින ලේ පරිත්‍යාග කිරීමේ වැඩසටහනට එක්වූ දැනට ආසාදිතව සිටින්නන් ඇතුළු  ග්‍රාමයෙහි පිරිසක් සාදයක් පවත්වා ඇති බවක්ද අනාවරණය වී ඇතැයි සදහන් කළ මහජන සෞඛ්‍ය පරීක්ෂක සුසන්ත බණ්ඩාර මහතා කියා සිටියේ, මේ සම්බන්ධයෙන් ගම්පහ සෞඛ්‍ය වෛද්‍ය නිලධාරීවරයා  දැනුවත් කරමින් එම පිරිස හදුනා ගැනීමට කටයුතු කරමින් සිටින බවය.