ඕස්ට්‍රේලියාවේ වික්ටෝරියා ප්‍රාන්තයෙන් අද (5) දිනයේ කොරෝනා ආසාදිතයින් 725 දෙනෙකු හා ආසාදිත මරණ 15 ක් වාර්තා වී තිබේ.

ඒ අනුව කොරෝනා වයිරසය ඕස්ට්‍රේලියාවේ වැඩිම පැතිරීමක් පෙන්නුම් කළ දිනය අද බව එරට සෞඛ්‍ය බලධාරීහු පවසති.

මියගිය පුද්ගලයින් අතර 30 හැවිරිදි තැනැත්තෙක් ද වෙයි.

වයිරසය පැතිරීම වැළැක්වීම සඳහා ප්‍රාන්ත අගුළු දැමීමේ සීමා වඩාත් දැඩි කිරීමෙන් දින කිහිපයකට පසු මෙම තත්ත්වය වාර්තා විය.

ප්‍රාන්ත ප්‍රධාන අමාත්‍ය ඩැනියෙල් ඇන්ඩෘස් පසුගිය ඉරිදා ප්‍රාන්තයේ ආපදා තත්ත්වයක් ප්‍රකාශයට පත්කළේය.

කෙසේ වෙතත් මෙම තත්ත්වය හේතුවෙන් අද (5) මධ්‍යම රාත්‍රියේ සිට අගුළු දැමීමේ සීමා පැනවීම තවත් අදියරකින් ක්‍රියාවට නැංවෙනු ඇත.

මේ අතර අසල්වැසි නිව් සවුත් වේල්ස් ප්‍රාන්තය සමඟ ප්‍රාන්ත සීමා වසා දමන බව ක්වීන්ස්ලන්ඩ් ප්‍රාන්තය අද නිවේදනය කළේය.

වෛරසය පැතිරීම ආරම්භයේදී පැනවූ සීමා හේතුවෙන් වෙනත් රටවලට වඩා ඕස්ට්‍රේලියාවේ යහපත් තත්ත්වයක් දක්නට ලැබුණ ද ජූනි මාසයේ සිට වෛරසය එරට තුළ වැඩි පැතිරීමක් පෙන්නුම් කර තිබේ.

-226-

(බීබීසී ඇසුරෙනි)