(බී.ජී.චතුරංග)

ඉන්ධන බවුසරයක් ගල්කුලම ඉන්ධන පිරවුම් හලේ භූගත ටැංකි සඳහා ඉන්ධන පොම්පකරමින් සිටියදී හදිසියේ හටගත් ගින්නක් හේතුවෙන් එම බවුසරය සහ ඉන්ධන පිරවුම් හල මුළුමනින්ම දැවී විනාශයට පත්වූ අතර සිදුවීමට ගිය විනාශයක් වළක්වා ගැනීමට අනුරාධපුර මහ නගර සභාවේ ගිනි නිවන ඒකකයේ නිලධාරිහු අද (16) සමත්වූහ.

ගින්න හේතුවෙන් ඉන්ධන පිරවුම් හලේ ඩීසල් සහ පෙට්‍රල් ඉන්ධන නිකුත් කරන පොම්ප සියල්ලම විනාශයට පත්වී තිබුණි. ඊට අමතරව ඉන්ධන පිරවුම් හලේ ගොඩනැගිල්ල සම්පූර්ණයෙන්ම විනාශයට පත්වී තිබූ අතර එහි තිබූ එල් පී ගෑස් ටැංකි විශාල ප්‍රමාණයක් ගින්නට හසුවී පුපුරා විනාශවී තිබුණි.

ඒ නමය ප්‍රධාන මාර්ගයට යාබදව පිහිටි ඉන්ධන පිරවුම්හල තුළ ගින්නක් හටගෙන තිබෙන බවට තිරප්පනය පොලිසියට සැලවීමත් සමග තිරප්පනය පොලිසියේ නිලධාරීන් පිරිසක් පැමිණ ගින්න නිවාදැමීමට දැඩි උත්සාහයක නිරතවූවත් ගින්න දැඩිව ව්‍යාප්තවීම හේතුවෙන් ගිනි නිවන ඒකකය කැඳවීමට පියවර ගනු ලැබීය.

ගිනි නිවන ඒකකයේ නිලධාරින් පැමිණ බවුසරය පුපුරා යාම වැළක්වීම සඳහා අවශ්‍ය පියවර ගනු ලැබූ අතර ඉන්ධන බවුසරයේ හටගෙන තිබූ ගින්න විනාඩි දහයක් පමණ ඇතුළත නිවා දැමීමට හැකිවිය. ගින්න සම්පූර්ණයෙන්ම නිවා දැමීමට පැය තුනකට අධික කාලයක් ගතවී තිබේ.

ගින්නෙන් කිසිඳු පුද්ගලයෙකුට අනතුරක් සිදුව නොමැති අතර යුද හමුදාවේ 211වන බල සේනාවේ නිලධාරින් පිරිසක් සිද්ධිය වූ ස්ථානයට පැමිණ ගින්න නිවීම සදහා සහය දැක්වූහ.

සිද්ධිය වූ ස්ථානයට ලංකා ඛණිජ තෙල් සංස්ථාවේ උතුරුමැද පළාත් ප්‍රාදේශිය කළමණාකාර ඒ.ජී.ජේ.ඩබ්ලිව් බංඩාර මහතා ඇතුළු නිලධාරින් පිරිසක්ද එහි පැමිණ සිටියහ.