ශලනි තාරකා පිළිබඳ කෙටියෙන්...

සම්පූර්ණ නම:

ගෝනකුඹුර පංගුකාරගේ ශලනි තාරකා

උපන්නෙ කොහෙද?:

බලන්ගොඩදී

වයස:

අවුරැදු 21 යි

සමත් විභාග:

සාමාන්‍ය පෙළ සහ උසස් පෙළ

ඉගෙන ගත් පාසල:

බලංගොඩ ශාන්ත ඇග්නට් සහ ශිෂ්‍යත්ව සමත්ව මීගමුව නිව්ස්ටඩ්

ලග්නය: කුම්භ

:::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::::

පවුලේ විස්තර ?

අම්මා, තාත්තා, අයියා, නංගි

උසස් පෙළ සමත් කිව්වා නේද ?

ඔව්.

එතැනින් එහාට අධ්‍යාපනය නොකළේ ?

සරසවි වරම් දක්වා සුදුසුකම් තිබුණා. ඒත් එදා ඉඳලම සරසවිය මට එතරම් ප්‍රියජනක වුණේ නැහැ. සරසවි උනන්දුව තිබුණේ නැහැ.

ඇයි ඒ ?

දන්නේ නැහැ.

මොනවගේ උනන්දුවක්ද තිබුණේ ?

කුඩා කාලයේ ඉඳලම චිත්‍රපට නරඹන්න ආසා කළා. ලොකු වෙද්දි ගුවන් සේවිකාවක වෙන්න හිතුණා. ඔෆිස් ජොබ් එකකට කවදාවත් කැමති වුණේ නැහැ.

ගුවන් සේවිකා සිහිනය ?

ඒක දැන් නැහැ.

දැන් ගුවන් සේවයට යන්න බැරිද ?

බැහැ කියලා හිතෙනවා.

ඔබට එක අරමුණක් නැහැ වගෙයි ?

අරමුණක් නැතිව කාටවත් වැඩ කරන්න බැහැ.

මොකක්ද අරමුණ ?

අහම්බෙන් ආපු රඟපෑමේ ගමන හොඳට කරමින් මගේම ව්‍යාපාරයක් ආරම්භ කිරීම තමයි අරමුණ.

ඒ කියන්නේ ජනප්‍රියත්වය ආභරණයක් කරගෙන කටයුතු කිරීම ද ?

මට ජනප්‍රිය උණ රෝගය නැහැ. ඒක එහෙම අයගෙන් අහන්න. සමහර අය ආව ගමන් පිපිරිලා යනවා. ඊට පස්සෙ හිටපු තැන් සොයා ගන්නත් බැහැ. මම ඒ රුල්ලෙ කෙනෙක් නෙවෙයි.

ඒ කියන්නේ ඔබ වඩා ජනප්‍රිය චරිතයක‍්ද ?

කොහෙත්ම නැහැ. සාමාන්‍ය පිරිසක් දන්න හඳුනන කෙනෙක්.

ඔබගේ තරමට අනුවද වැඩ කරන්නේ ?

ඔව්, අනිවාර්යෙන්ම එහෙමයි.

එතකොට රඟපෑම වෘත්තිය නොවේද ?

වෘත්තියම නෙවෙයි. මගේ හීනය සාර්ථක ව්‍යාපාරයක් ගොඩ නැගීමයි. නමුත් දැනට රංගනයට උපරිම කැපවීම කරනවා.

කැම්පස් යන්න හැමෝටම වරම් ලැබෙන්නෙ නැහැ. ඒක පිනක්. ඔබ ඒ පිනට පයින් ගහලා කිව්වොත් ?

ඒ පරිසරය ගැන පොඩි කාලයේ ඉඳලම මට පැහැදීමක් තිබුණෙ නැහැ.

දෙමාපියන් හරස් වුණේ නැද්ද ?

කිසිදේකට මට බල කළේ නැහැ. අපට යහපත් මාර්ගය කියලා දුන්නාට අපේ ජීවිතවලට සීමා දැම්මෙ නැහැ.

ඒ කියන්නෙ ඉගෙන ගෙන පිළිගත් තනතුරක් අවශ්‍ය නැහැ කියන එකද ?

මේ ලැබුණු දේට මම උපරිමව ගරු කරනවා. ඒ වගේම කැපවෙනවා.

සිරස කුමරියගෙන් පසුව, රංගනයට, ඊ ළඟට දැන්වීම්වලට පෙනී සිටි ඔබ තරු වැඩසටහන්වලට අමතරව වැඩසටහන් නිවේදනයටත් එක් වුණා ඊළඟට මොනවද කරන්නෙ?  මොනවද ඉතුරු වෙලා තියෙන්නේ ?

දැනට එච්චරයි.

ඒ සියල්ල හොඳින් කළා කියලා හිතෙනවද ?

දන්නෙ නැහැ. ලැබුණු දේ උපරිමයෙන් කළා.

මේ සියල්ල කරන්නෙ මුදල් මුල් කරගෙනද ?

මුදල් අවශ්‍යයි. ඒත් මුදල් මුල් කරගෙනම නෙවෙයි. මම කාටවත් මේ දක්වා අත පාලා නැහැ. ලැබෙන දේ සතුටින් බාරගෙන ජීවත්වෙනවා.

ඔබ හරි මුරණ්ඩුයි නේද ?

ටිකක් විතර.

ඇයි එහෙම වෙන්නේ ?

ඒ මගේ හැටි.

ඇත්තටම ඔබ කවුද ?

මම ශලනි.

කොහොම කෙනෙක්ද ?

මගේ පිටතින් එකක්. ඇතුළාන්තයෙන් එකක් කියලා දෙබිඩි ජීවිතයක් නැහැ. මවා ගත්ත ලෝකයක් නැහැ. ඉක්මනට කේන්ති යනවා. ඒ මොහොතේදීම සෑම දෙයක්ම විසඳගන්නවා.

තරුණියක ලෙස සම්මතයට අනුව ජීවිතය ගෙවනවා කියලා හිතෙනවාද ?

අසම්මත දේවල් කරලා නැහැ.

ආදරේ දී වුණත් එහෙමද ?

ඔව්.

පෙම්වතුන් කීප දෙනෙකුට එකවර ආදරය කිරීම ?

මට එහෙම පහත් මානසිකත්වයක් නැහැ. යම්කිසි කෙනෙකුට හිත ගියොත් ගියාම තමයි. එතකොට මම එයාට උපරිමයෙන් ආදරය කරාවි.

ළඟදී විදෙස් සංචාරයකට යනවා නේද ?

ඔව්, කොරියා සහ ලන්ඩන් යනවා.

මොකටද ?

නර්තන සහ සංගීත ප්‍රසංගවලට සහභාගී වෙන්න.

සංගීතයත් පුළුවන්ද ?

තරමක් දුරට.

සිහින පියාපත් ‍"මිහිරංගි" ගැන ඔබට හිතෙන්නේ කොහොමද ?

ලොකු වෙනසක්. හැබැයි ඒ මම නෙවෙයි. මම කළ වෙනස්ම චරිතයක්. මට ලැබෙන ප්‍රතිචාර ඉතා ඉහළයි. ඒ නිසා මගේ ආදරණීය ප්‍රේක්ෂකයන්ට ස්තූතියි කියලා කියන්න කැමතියි.

සටහන / ඡායාරුප - සඳුන් ගමගේ