(මාවතගම කාන්චනමාලා බණ්ඩාර)
වන්දනා ගමනක් ගිය බිරියගේ දුරකතන පණිවුඩය එද්දී සූර්වී සිටි සැමියකු දැක් වූ අපූරු ප්‍රතිචාරයක් පිළිබඳව මාවතගමින් වාර්තා විය.


සිද්ධිය මෙසේය.


වයඹ පළාතේ එක්තරා නිවසක සැමියකු හා බිරිය සාමයෙන් සතුටින් ජීවත්  වූ අතර ඔවුන්ගේ දුකට සැපට දෙකටම සිටියේ ආදරයෙන් ඇති දැඩි කළ බල්ලා පමණි.


බිරිය බල්ලාට කෑම වේල අඩුවක් නැතිව දුන්නේය. එක් දිනක් බිරිය වන්දනාවේ ගියාය. නිතර සැමියාට දුරකතනයෙන් කතා කළ ඇය කෑම බීම ගැන විපරම් කළාය.


“හරි ඔක්කොම හරි හොඳට වැඳගන්න. ඒවා ගැන හිතන්න එපා”


බිරියගෙන් වෙන්ව සැනසුම අපේක්‍ෂා කළ සැමියා ලද නිදහසින් සතුටට පත්ව බෝතලයක් ගෙදරටම ගෙනැවිත් හොඳින් සප්පායම් වූයේය.


එදින රාත්‍රි ආහාරයට පෙති පාන් රාත්තලක් ගෙනා ඔහු මාළු මිරිස් හොද්දක් ද සාදා ගත්තේය.


රාත්‍රි එළඹි පැය දෙක තුනක් ගතවෙද්දී බිරියගෙන් දුරකතන ඇමතුමක් ලැබුණේය.


මේ ඔයා රෑට කෑව ද? අනේ කන දෙයක් අමතක නොකර බල්ලාටත් දෙන්න” තම බිරියගේ ඉල්ලීම අකුරටම ඔහු පිළිපැදීය.


වන්දනා නඩය ආපසු පැමිණියේ සිතුවාටත් වඩා කලින් බිරිඳ ගෙට ගොඩවිය. ඈට දක්නට ලැබුණේ පිඟානකට දමන ලද පාන්පෙති දෙකක් හා පීරිසියකට දෙන ලද මාළු මිරිස් කරලක් හා හොදි ස්වල්පයක් බල්ලා අසල තබා ඇති අයුරුය. බල්ලා නිහඬව ඒ දෙස බලා සිටියේය. සැමියා හොඳටම සූර්වි පුටුවක නිදා සිටින අයුරු දකින්නට ලැබුණි. සැමියා බල්ලාට කළ අපූරු සංග්‍රහය පිළිබඳව බිරියගේ කෝපය ඉහවහා ගියේය.