හඹා එන කුළු හරක් රංචුවකට බියෙන් ගස්බඩගානා සිංහයකු කෙන්යාවේ මසායි මාරා වනෝද්යානයේ සැරිසරමින් සිටි චාර්ල්ස් කොමින්ගේ කැමරාවේ සටහන් විය.
සංචාරය අවසන් කර නැවත නවාතැන බලා ඒමට තීරණය කළ අවස්ථාවේදී අහම්බයෙන් මෙන් මෙම සිදුවීම දුටු බව ඔහු කියයි.
සිංහයා කුළු හරක් රංචුවේ පැටවකුට කුරුමාණම් අල්ලමින් සිටියේය. පැටවා ගොදුරු කරගැනීමට ඔන්න මෙන්න තිබියදී ඉව වැටුණු වැඩිහිටි කුළු හරකුන් කලබල වීම නිසා සිංහයාගේ බලාපොරොත්තු සුන්විය.
පසුපස හඹා ආ කුළු හරකුගෙන් බේරීමට සිංහයාගේ පිහිටට පැමිණ ඇත්තේ අසළ තිබූ ගසකි.
කුළු හරක් රංචුවද ගස යටට පැමිණි බව චාර්ල්ස් පවසයි.සතුරාට එසේ ලෙහෙසියෙන් ගැලවීමට ඉඩදීම ඔවුන්ගේ අරමුණ නොවුණු සෙයකි.
අමාරුවෙන් බඩගාගෙන ඉහළට නැගගත්තද නැවත නැවතත් පහළට ලිස්සන්නට වීම නිසා ගසේ රැඳී සිටීමට ගත් උත්සාහය අතහළ සිංහයා ගොරවාගෙන බිමට පැන පසුනොබලා කැලයට වැදුණේය.
මේ සියල්ල ඡායාරූපයට නැගීමට චාර්ල්ස් කොම්යින් සමත්ව තිබෙන අතර එම ඡායාරූපයන්ට මේ දිනවල අන්තර්ජාලයේ මෙන්න මාධ්ය වලද ලැබී ඇත්තේ මහත් පිළිගැනීමකි.
