ලෝක බැංකුව කියයි
සුජිත් හේවාජුලිගේ
ශ්‍රී ලංකාවේ පනස් හත් ලක්ෂ හැත්තෑ හත් දහසකට ආසන්න පිරිසක් දරිද්‍රතාවෙන් පෙළෙන බව ලෝක බැංකුව විසින් නිකුත් කෙරුණු අලු‍ත්ම වාර්තාවක සඳහන් වන්නේ යැයි පේරාදෙණිය විශ්වවිද්‍යාලයේ ආර්ථික විද්‍යා සහ සංඛ්‍යාන අධ්‍යයන අංශයේ මහාචාර්ය වසන්ත අතුකෝරල මහතා පැවසීය.
මේ පිරිස දරිද්‍රතාවට පත්ව ඇත්තේ ඉහළ ගිය උද්ධමනය, ජනතාවගේ ආදායම් වැඩි නොවීම, රැකියා අහිමිවීම සහ ආදායම් කඩා වැටීම යනාදී හේතූ නිසා බව ලෝක බැංකුව සඳහන් කරන්නේ යැයිද ඔහු සඳහන් කළේය.
ලෝක බැංකුව පහළ මධ්‍යම ආදායම්ලාභී දරිද්‍රතා රේඛාව වන දිනක වියදම ඩොලර් 3.65 සීමාව සැලකිල්ලට ගෙන කළ අධ්‍යයනයක දී මෙම තොරතුරු අනාවරණය කරගෙන ඇත.
මේ අතර මේ වර්ෂයේ දී දරිද්‍රතාවෙන් පෙළෙන සංඛ්‍යාව ලක්ෂ දෙකකින්ද, ලබන වර්ෂයේදී එම සංඛ්‍යාව ලක්ෂ තුනකින් ද වශයෙන් සුළු අගයකින් අඩුවිය හැකි බව එම බැංකුව පුරෝකථනය කරයි.
මේ තොරතුරු සඳහන් වන්නේ ලෝක බැංකුව විසින් ශ්‍රී ලංකාවේ සංවර්ධන ප්‍රගතියට අදාළව නිකුත් කෙරුණු අලු‍ත්ම වාර්තාවේය.
