තෙල් බෙදීම නිරීක්ෂණයට හමුදාව


(සුජිත් හේවාජුලිගේ)  

ඉන්ධන බෙදාහැරීමේ කටයුතු නිරීක්ෂණය කිරීම සඳහා යුද හමුදා නිලධාරීන් රට පුරා යෙදවූ බව යුද හමුදාපති ජෙනරාල් ශවේන්ද්‍ර සිල්වා මහතා ඉරිදා ලංකාදීපයට පැවැසීය. 

ප්‍රධාන ඉන්ධන මධ්‍යස්ථානවල සිට පිටත් වන ඉන්ධන බවුසර් ඉන්ධන පිරවුම්හල් වෙත නියම ආකාරයට පැමිණෙන්නේ දැයි සොයා බැලීම සඳහා මෙම නිරීක්ෂණ වැඩපිළිවෙළ ආරම්භ කළ බවද යුද හමුදාපතිවරයා සඳහන් කළේය.  


යුද හමුදාව මෙම වැඩපිළිවෙළ ක්‍රියාත්මක කර ඇත්තේ ජනාධිපති ගෝඨාභය රාජපක්ෂ මහතාගේ විශේෂ උපදෙස් අනුවය.  


සෑම ඉන්ධන බවුසරයක්ම ප්‍රධාන ඉන්ධන ගබඩාවලින් පිටත් වූ වහාම අදාළ ප්‍රදේශයන්හි යුද හමුදා ආඥාපතිවරයාට දැනුම් දෙනු ලැබේ. ඒ අනුව ආඥාපතිවරයා විසින් නිරීක්ෂණ කටයුතු සඳහා හමුදා නිලධාරීන් කණ්ඩායම් අදාළ ප්‍රදේශවලට හෝ මාර්ගවලට යෙදවෙති.  


කොලොන්නාව, මුතුරාජවෙල ප්‍රධාන ඉන්ධන ගබඩා සංකීර්ණවලට අමතරව ඉන්ධන බෙදාහැරීමේ ඩිපෝ 12ක් රටපුරා ක්‍රියාත්මක වේ.  


මේ අතර ඉන්ධන බෙදාහරින දුම්රියවල ආරක්ෂාව සඳහා යුද හමුදා සහ ගුවන් හමුදා නිලධාරීන් යොදවා ඇතැයි ශවේන්ද්‍ර සිල්වා මහතා වැඩිදුරටත් පැවසීය.