(ආනන්ද ඉ. ජයකොඩි)
හෙරොයින් බෙදාහැරීමේ ජාවාරමක් කරගෙන ගිය බව කියන යුධ හමුදාවේ විශේෂ බළකායේ හිටපු සෙබලෙකු, කාන්තාවක් හා ඔවුන් දෙදෙනාට ආධාර හා අනුබල දුන් බව කියන අපරාධ පරීක්‍ෂණ දෙපාර්තමේන්තුවේ රහස් පොලිස් සැරයන්වරයෙකු පෙබරවාරි 11 වෙනිදා දක්වා රිමාන්ඩ් භාරයේ රඳවා තැබීමට අත්තනගල්ල මහේස්ත‍්‍රාත් තරංගා රාජපක්‍ෂ මහත්මිය අද (28) නියෝග කළාය.
නිට්ටඹුව කලල්පිටිය පදිංචි බෝදාහැන්නැදිගේ යසේන්ද්‍ර මංජුල, ජාඇල තුඩැල්ල පදිංචි සිංගප්පු රාජේශ්වරී හා අපරාධ පරීක්‍ෂණ දෙපාර්තමේන්තුවේ රහස් පොලිස් සැරයන්වරයෙකු වන වෝල්ටර් ශ‍්‍රී නිශාන්ත කුමාර යන සැකකරුවන් දෙදෙනා හා සැකකාරිය එසේ රිමාන්ඩ් කෙරිණි.
පොලිස් විශේෂ කාර්ය බළකායේ නිලධාරීන් පිරිසක් පස්යාල ප‍්‍රදේශයේ කරන ලද හදිසි සෝදිසි මෙහෙයුමකදී රුපියල් ලක්‍ෂ එකහමාරක් පමණ වටිනා හෙරොයින් ග‍්‍රෑම් අසූවයි මිලිග‍්‍රෑම් හාරසිය පනහක් සමඟ සැකකරු හා සැකකාරිය අත්අඩංගුවට ගෙන පොලිස් මත්ද්‍රව්‍ය නාශක කාර්යාංශයට භාරදී තිබිණි.
පොලිස් මත්ද්‍රව්‍ය නාශක කාර්යාංශය වැඩිදුර පරීක්‍ෂණ පවත්වා අපරාධ පරීක්‍ෂණ දෙපාර්තමේන්තුවේ සැකකාර රහස් පොලිස් සැරයන්වරයා අත් අඩංගුවට ගෙන තිබිණි.
