සිසුන්ට ගංජා අලෙවි කළ හිටපු හමුදා සෙබළා අත්අඩංගුවට


(තුසිත කුමාර ද සිල්වා)
 
බේරුවල, මතුගම, කළුතර ඇතුලු අධ්‍යාපන කොට්ඨාසයන්හි සිසුන් ඉලක්ක කර කේරළ ගංජා ජාවාරමක නිරත වූ හිටපු යුද හමුදා සෙබළෙකු කේරල ගංජා ග්‍රෑම් 200 ක් හා ගංජා සුරුට්ටු ඉරීමට ගන්නා දුම්වැටි ෆිල්ටර් 35 ක් සමග අද (23) අත්අඩංගුවට ගත් බව කොට්ඨාස අපරාධ විමර්ශන ඒකකයේ නිලධාරීහු පවසති.
 
 අත්අඩංගුවට පත් විශ්‍රාමික හමුදා සෙබළා කුඩලිගම පදිංචි 31 හැවිරිදි අයෙකි.
 
සැකකාර සෙබළා කලක සිට කළුතර දිස්ත්‍රික්කය පුරා ඇති පාසල් හා උපකාරක පංති අවට ගැවෙසෙමින් සිසුන් හා මිත්‍ර වී, කේරළ ගංජා පානයට හුරු කර මෙම ජාවාරම කර ඇතැයි නිලධාරීන් අනාවරණය කර තිබේ. ඇතැම් අවස්ථාවල උපකාරක පංතිවල අත් පත්‍රිකා බෙදීම් වැනි කටයුතුවල නිරත වන අය හා එක්ව එම පත්‍රිකා බෙදීමට ද ස්වේච්ඡාවෙන් ඉදිරිපත් වී ඇති බවත් අනාවරණය කරගෙන තිබේ.
 
මෙම සැකකරු සිසුන් 10 දෙනෙකුගේ කණ්ඩායමකට ගංජා පැකට්ටුවක් රු. 3000ක මුදලකට අලෙවි කර ඇති බවත් එමගින් ගංජා පානය කරන තවත් කණ්ඩායම් හඳුනා ගැනීමට එම කටයුතු කර  ඇති බවච පොලිස් නිලධාරියෙක් පැවසීය.
 
අත්අඩංගුවට ගත් විශ්‍රාමික සෙබළා අධිකරණයට ඉදිරිපත් කිරීමට නියමිතය.
===========