(ටෝනි කරුණානායක)
ව්‍යාජ විදේශ ගුවන් ගමන් බලපත්‍රයක් ඉදිරිපත් කරමින් අන් අයෙකු ලෙස පෙනී සිටි මිනිමැරුම් නඩුවක විත්තිකරුවෙකු ලබන 09 වැනිදා දක්වා රක්ෂිත බන්ධනාගාර ගත කරන ලෙස මිනුවන්ගොඩ වැඩ බලන මහෙස්ත්‍රාත් ඉන්දිකා රත්නායක මහත්මිය අද (06) නියම කළාය.
දිවුලපිටිය කඩවල ප්‍රදේශයේ පදිංචි එම්.චන්දන පුෂ්පකුමාර නැමැති සැකකරුවෙකු මෙලෙස රක්ෂිත බන්ධනාගාර ගතකරනු ලැබීය.
සැකකරු අත්අඩංගුවට ගැනීම සඳහා මීගමුව මහාධිකරණය මගින් විවෘත වරෙන්තු නිකුත් කර තිබූ අතර ගම්පහ කොට්ඨාස අපරාධ විමර්ශන අශංයේ නිලධාරීන් කණ්ඩායමක් විසින් සැකකරුව මිනුවන්ගොඩ කටුවැල්ලේගම පලුගහවෙල ප්‍රදේශයේ දී අත්අඩංගුවට ගෙන තිබේ.
සැකකරුගේ රුව ඇති වෙනත් අයෙකුගේ නම සඳහන් විදේශ ගුවන් ගමන් බලපත්‍රයක් සැකකරු විසින් පොලිස් නිලධාරීන්ට ඉදිරිපත් කර තිබූ අතර එම ගුවන් ගමන් බලපත්‍රය පරීක්ෂා කිරීමේ දී එය අන් අයෙකුට අයත් එකක් බව පොලිසිය අනාවරණය කරගැනීමෙන් අනතුරුව සැකකරු අත්අඩංගුවට ගෙන මිනුවන්ගොඩ පොලිසිය වෙත බාර දි තිබේ.
සැකකරු මෙම ව්‍යාජ ගුවන් ගමන් බලපත්‍රය උපයෝගී කරගනිමින් තවත් අපරාධ සඳහා යොමු වූයේ ද යන්නත් සැකකරුට එම ව්‍යාජ ගුවන් ගමන් බලපත්‍රය සාදාගැනීම සඳහා ආධාර අනුබලදීමට සහාය ලබා දුන් පුද්ගලයන් සම්බන්ධයෙන් පරීක්ෂණ සිදු කරන බව මිනුවන්ගොඩ පොලිසිය අධිකරණය හමුවේ පැවසීය.
විවෘත වරෙන්තුවට අදාළව සැකකරුව මීගමුව මහාධිකරණය හමුවට ඉදිරිපත් කරන ලෙස මීගමුව බන්ධනාගාර නිලධාරීන්ට නියම කළ අධිකරණය ඒ සම්බන්ධයෙන් වාර්තාවක් ලබන 09 වැනිදාට මිනුවන්ගොඩ මහෙස්ත්‍රාත් අධිකරණයට ඉදිරිපත් කරන ලෙස මීගමුව බන්ධනාගාර නිලධාරීන්ට වැඩිදුරටත් නියෝග කළේය.
