(ඩී.ජී.සුගතපාල)
 
සීමා සහිත අක්මීමණ විවිධ සේවා සමුපකාර සමිතියේ ප්‍රාදේශික කාරක සභා ඡන්ද විමසිමේදී ප්‍රාදේශික දෙකක් වෙනුවෙන් ව්‍යාජ අත්සන් යොදා නාම යෝජනා පත්‍ර දෙකක් ඉදිරිපත් කිරීම සම්බන්ධයෙන් අත්අඩංගුවට ගෙන අධිකරණයට ඉදිරිපත් කරන ලද දෙදෙනෙකු එක් අයෙකු රුපියල් ලක්ෂය බැගින්වූ ශරීර ඇපයක් මත මුදා හැරීමට ගාල්ල ප්‍රධාන මහේස්ත්‍රාත් හර්ෂන කැකුණවෙල මහතා අද (07) නියෝග කළේය.
 
ගාල්ල දිස්ත්‍රික් සමුපකාර සංවර්ධන උප කොමසාරිස්වරයාගේ නියමය පරිදි සමූපකාර සමිතියේ ප්‍රාදේශික කාරක සභා ඡන්ද විමසීම සඳහා නාම යෝජනා කැඳවනු ලැබූ අවස්ථාවේ අඹගහවිල ප්‍රාදේශිකයට පුද්ගලයෙකුගේ නමින් බාරදී ඇති එක් නාම යෝජනා පත්‍රයක්ද කලහේ ප්‍රාදේශිකයට කාන්තාවකගේ නමින් බාරදි ඇති එක් නාම යෝජනා පත්‍රයක්ද ව්‍යාජ ඒවා බවට ලැබුණ තොරතුරක් අනුව  සමූපකාර සමිතියේ සභාපතිවරයා විසින් පොලිසියට පැමිණිලි කර ඇත.
 
ඉල්ලුම්පත්‍රවල නම් සඳහන් දෙදෙනාද ප්‍රකාශයන් ලබාදෙමින් පවසා ඇත්තේ තමන් මේ සම්බන්ධයෙන් කිසිවක් නොදන්නා අතර තමන්ගේ කිසිම අනුදැනුමකින් තොරව ලබාදී ඇති නාම යෝජනා පත්‍රවල ඇත්තේද  තමන්ගේ අත්සන් නොවන බවය.