(බිමල් ශ්‍යාමන් ජයසිංහ)
නවගමුව ලැගුම්හලක නානකාමරයක් තුළ පුලුස්සා ඝාතනය කර ඇත්තේ මොස්තර ශිල්පියකු බව මූලික පරීක්ෂණවලදී අනාවරණය වූ බව නවගමුව පොලිසිය කියයි.
ඝාතනය වූ පුද්ගලයා කොළඹ තිඹිරිගස්යාය පාර පදිංචි ගනිදු මල්ෂාන් ප්‍රියංකර නමැති 25 හැවිරිදි පුද්ගලයෙකි.
එම පුද්ගලයා 29 දින සවස සාදයකට යන බව පවසා නිවසින් පිටවී ඇතැයි දෙමව්පියන් පැවසූ බව පොලිසිය පවසයි.
ඔහු තවත් පුද්ගලයකු සමග ලැගුම්හලට පැමිණ තිබූ අතර ඉනේ එක් අයකු පිටව ගොස් තිබිණි. පසු දින උදයේ එහි සේවකයකු මළ සිරුර දැක ඇත.
ඝාතකයා මෙම තැනැත්තාව උපක්‍රමශීලීව ලැගුම්හලට කැඳවා අපරාධය කරන්නට ඇතැයි පොලිසිය සැක පළ කරයි.
මෙම පුද්ගලයන් දෙදෙනාගේ අනන්‍යතාව සනාථ කරගැනීම සඳහා ලැගුම්හල භාරව කටයුතු කළ අරක්කැමියා පියවර නොගැනීම නිසා ඔහුවද පොලිසිය අත්අඩංගුවට ගෙන ඇත.
මෙම පුද්ගලයා ඝාතනය කළ තැනැත්තා සොයාගැනීම සඳහා විශේෂ පොලිස් කණ්ඩායමක් යොදවා ඇති බව උසස් පොලිස් නිලධාරියෙක් පැවසීය.
