(බිමල් ශ්‍යාමන් ජයසිංහ)
රාගම බටුවත්ත දුම්රිය පොළේ දී රුපියල් ලක්ෂ දෙකක් පමණ වටිනා හෙරොයින් මත්කුඩු සමග අද (7)අත්අඩංගුවට ගත් දෙදෙනාගෙන් ප්‍රශ්න කිරීමේදී මිනීමැරුමක මෙන්ම අපරාධ රැසක තොරතුරු අනාවරණ වූ බව බස්නාහිර පළාත උතුර දිශාව අපරාධ කොට්ඨාසය කියයි.
එම සැකකරුවන් දෙදෙනා සන්තකේ තිබී මත්කුඩු ග්‍රෑම් 10 පොලිසිය භාරයට ගෙන ඇත.
බස්නාහිර පළාත උතුරු දිසාව අපරාධ කොට්ඨාසයට ලද තොරතුරක් අනුව අත්අඩංගුවට ගත් මෙම සැකකරුවන් දෙදෙනාගෙන් ප්‍රශ්න කිරීමේදී 2015 වසරේ සිට මේ දක්වා කඩවත, රාගම හා කඳාන පොලිස් වසම්වල සොරකම් 50 ආසන්න ප්‍රමාණයක තොරතුරු, ඝාතනයක තොරතුරු ද අනාවරණය වූ බව පොලිස් නිලධාරියෙක් පැවැසීය.
පොල් කැඩීමේ මුවාවෙන් එකී ප්‍රදේශවල සංචාරය කරන මෙම සැකකරුවන් දෙදෙනා නිවෙස්වල කිසිවෙකුත් නොමැති අවස්ථා බලා එම නිවෙස් බිඳ දේපොළ සොරා ගැනීම, වයෝවෘද්ධ අය වෙතොත් ඔවුන්ගේ අත් පා බැඳ දේපල කොල්ල කා ඇති බව ප්‍රශ්න කිරීමේදී අනාවරණය වූ බව පොලිස් නිලධාරියෙක් පැවැසීය.
ඒ අයුරින් 2002 වසරේදී කඩවත මංකඩ පාරේ නිවසක පොල් කැඩීම සඳහා ගිය අවස්ථාවේදී එම නිවසේ සිටි 70 හැවිරිදි වයෝවෘද්ධ කාන්තාවක පමණක් සිටිනු දැක ඇයගේ කටට රෙදි කැබලි ඔබා, අත් පා බැඳ දේපළ කොල්ල කෑ බවත්, ඒ හේතුවෙන් ඇය මිය ගිය බවත්, ප්‍රශ්නවලදී අනාවරණය වී ඇත.
