(උපාලි ආනන්ද)
වාහල්කඩ යාන්ඔය ව්‍යාපෘතියෙන් වැලි ප‍්‍රවාහනය කිරීම සඳහා බලපත‍්‍ර නිකුත් කිරීමේදී හොරොව්පොතාන ප්රාදේශීය සභාව සම්බන්ධ කර ගන්නා ලෙස කැබිතිගොල්ලෑව දිසා විනිසුරු සහ මහේස්ත‍්‍රාත් මනෝජ් ප‍්‍රභාකරන් මහතා භූ විද්‍යා හා පතල් හා කැණීම් කාර්යංශයට අද (14) නියෝග කළේය.
වාහල්කඩ යාන්ඔය ව්‍යාපෘතියේ සිට පිට පළාත් වලට වැලි ප‍්‍රවාහනය කරන ලොරි රථ වලින් කප්පම් ලබාගත් බව කියන කප්පම්කරුවන් සතුව තිබූ බව කියන මුදල් බලහත්කාරයෙන් ලබා ගත් බවට හොරොව්පොතාන ප්රාදේශීය සභාවේ සභාපතිවරයා ඇතුළු සැකකරුවන් හය දෙනෙකුට එරෙහිව පැවැති පැමිණිල්ලක් කැබිතිගොල්ලෑව මහේස්ත‍්‍රාත් අධිකරණය හමුවේ යළි කැදවූ අවස්ථාවේ විනිසුරු ප‍්‍රභාරකන් මහතා මෙලෙස නියෝග කෙරිණි.
මීට පෙර මෙම පැමිණිල්ල අධිකරණය හමුවේ කැඳවු අවස්ථාවේ නිකවැරටිය කොටිඨාස බාර පොලිස් අධිකාරි සංජීව බණ්ඩාර හොරොව්පොතාන සහකාර පොලිස් අධිකාරි සේනක ජයසිංහ සහ හොරොව්පොතාන පොලිසියේ ස්ථානාධිපති පොලිස් පරික්ෂක රොෂාන් සංජීව යන මහත්වරුන්ට මහේස්ත‍්‍රාත්වරයා නියෝග කළේය.
වාහල්කඩ යාන්ඔය ව්‍යාපෘතියේ සිට පිට පළාත් වලට වැලි ප‍්‍රවාහනය කරන ලොරි රථ වලින් නීතිවිරෝධී ව මුදල් ලබා ගැනීම වහාම ක‍්‍රියාත්මක වන පරිදි මේ මොහොතේ සිට නතර කිරීමට අවශ්‍ය පියවර ගන්නා ලෙසයි.
එලෙස යම් සංවිධානයක් හෝ පුද්ගලයකු නීති විරෝධීව වැලි ලොරි රථ වලින් මුදල් ලබා ගන්නේ නම් ඔවුන් අත්අඩංගුවට ගෙන අධිකරණය හමුවට ඉදිරිපත් කරන ලෙසටද මහේස්ත‍්‍රාත්වරයා මෙම උසස් පොලිස් නිළධාරීන්ට තවදුරටත් නියෝග කරනු ලැබීය.
වැලි ලොරි රථ වලින් කප්පම්කරුවන් දිනකට රුපියල් ලක්ෂ දහයකට අධික මුදලක් නීතිවිරෝධීව එකතු කරන බවත් මෙම නීති විරෝධී ක‍්‍රියාවන් ඉදිරියේ පොලිසිය නිහඩ පිළිවෙතක් අනුගමනය කිරීම ප‍්‍රබල සැකයකට හේතුවක් වී ඇති බව මීට පෙර ජනාධිපති නීතිඥ කරුනාර්න හේරත් මහතා අධිකරණයට කීවේය.
පසුගිය කාලයේ මෙලෙස රුපියල් කෝටි ගණනක් මහජන මුදල් කප්පම්කරුවන් කොල්ලකා ඇති බවද එදින අධිකරණයට සැල කළ ජනාධිපති නීතිඥ හේරත් මහතා එම මුදල් නීති විරෝධීව එක්රැස් කළ පුද්ගලයින් හඳුනා ගැනීමට හැකි ලේඛන පවතින බවත් ඒ අනුව ඔවුන් පොලිසිය නෙපමාව අත්අඩංගුවට ගත යුතු බවත් අවධාරණය කළේය.
