(ක.ග.කරුණාරත්න)
 
මින්නේරිය නගරයේ පිහිටි තොග සහ  සිල්ලර වෙළඳසැලක අද(14) අලුයම ඇතිවූ ගින්නකින් එහි තිබූ බඩු බාහිරාදිය සියල්ල මුළුමනින්ම විනාශවී ගොස්  ඇතැයි  මින්නේරිය පොලීසිය  කියයි.
 
ගින්න හේතුවෙන් එම වෙළඳසැලේ ගොඩනැගිල්ලටද දැඩිලෙස හානි සිදුව තිබේ.
 
පොළොන්නරුව මහ නගර සභාවේ ගිනි නිවීම් ඒකකය, පොලීසිය, යුද හමුදාව සහ ප‍්‍රදේශවාසීන් එක්ව එය පාලනය කර නිවා දමා තිබේ. ඒ හේතුවෙන් අවට වෙළඳසැල් වෙත ගින්න පැතිරයාම වළක්වා ගැනීමට හැකිවූ බව පොලීසිය සඳහන් කළේය.
 
මෙම ගින්න හට ගැනීමට හේතුව අනාවරණයවී නොමැති අතර ගින්නෙන් වෙළඳසැලට සිදුවූ හානිය කොපමණද යන්න මෙතෙක් තක්සේරු කර නැතැයිද විමර්ශන සිදුකරන පොලිස් නිලධාරීහු පැවැසූහ.
 
මින්නේරිය පොලීසිය මේ පිළිබඳව පරීක්‍ෂණ පවත්වයි.