(ඉන්දිකා රාමනායක)
 
නීතිවිරෝධි ලෙස ජලය ලබාගෙන ජාතික ජලසම්පාදන හා ජලාපවහන මණ්ඩලයට රුපියල් 40,000 ක පමණ අලාභයක් සිදුකිරීමේ චෝදනාවට මාලිගාකන්ද මහේස්ත්‍රාත් අධිකරණය හමුවේ වරද  පිළිගත්  ග්‍රෑන්ඩ්පාස්හි  පදිංචිකරුවකුට ප්‍රධාන මහේස්ත්‍රාත් කෝසල සේනාධීර මහතා රුපියල් 10,000 ක දඩ මුදලක් නියම කළේය.
 
දඩමුදල් නියම වුයේ ග්‍රෑන්ඩ්පාස්  පදිංචි  ඩී බාලසුබ්‍රමනියම් නැමැත්තායට.
 
සැකකරු සිය  ගබඩාවට   මාස 15 ක පමණ කාලයක් සිට වංචනික  ලෙස ජලය  ලබාගෙන ඇති බවට ජාතික ජලසම්පාදන හා ජලාපවහන මණ්ඩලයේ ජල වැටලීම්  ඒකකයේ    ඉංජිනේරු  ඒ.  ඩී. එම්.  සිල්වා සහ   එච්. ඊ. ඒ.   ප්‍රනාන්දු යන මහත්ම මහත්මීන්  ග්‍රෑන්ඩ්පාස් පොලිසිය සමග ගොස් කළ වැටලීමේ දී හෙළි කරගෙන ඇති බව අධිකරණයෙන් වාර්තා වේ.
 
අනවසරයෙන් ජලය ලබාගෙන  පරිභෝජනය කිරීමේ චෝදනාව යටතේ විත්තිකරු අධිකරණයට ඉදිරිපත් කර තිබු අතර එහි දී  විත්තිකරු එකී චෝදනාවට  වරද පිළිගෙන තිබිණි.
 
සියලු කරුණු  සැලකිල්ලට ගත් මහේස්ත්‍රාත්වරයා  විත්තිකරුට ඉහත දඩමුදල් නියම කළ අතර    මණ්ඩලයට සිදුකළ  රුපියල් 39,771 ක අලාභ මුදල ලබන 10 දිනට පෙර ගෙවන ලෙසට ද නියම කළේය.
 
ජාතික ජලසම්පාදන හා ජලඅපවහන මණ්ඩලයේ  ප්‍රධාන ඉංජිනේරු    කේ. ප්‍රේමකුමාර මහතා  පැමිණිල්ල මෙහෙයවීය.