(ජී.ඩබ්ලිව්.කේ.පේ‍්‍රමතිලක ද සිල්වා)
 
නිධානයක් ගැනීමේ අරමුණින් තමා පදිංචි ඉඩමේ  අඩි 20ක පමණ උමගක් හාරමින් සිටි පුද්ගලයෙක් සහ ඔහුගේ සහායට සිටි තවත් දෙදෙනෙක් කැනීම් උපකරණද සමඟ අද (19) හියාරේ නැගෙනහිර ඉහළ  ඕවකන්දේදී හියාරේ විශේෂ කාර්යය බලකා කඳවුරේ නිලධාරීන් විසින් අත් අඩංගුවට ගෙන තිබේ.
 
විශේෂ කාර්යය බලකායේ බුද්ධි නිලධාරීන්ගේ  තොරතුරක් මත මෙම වැටලීම සිදුකර තිබේ. අත්අඩංගුවට ගත් 45 හැවිරිදි ප‍්‍රධාන සැකකරුගෙන් කළ ප‍්‍රශ්න කිරීමේදි අනාවරණය වී ඇත්තේ සැකකරු  නිධානයක්  පවතින බවට සිහිනයකින් දුටු ස්ථානයක් මෙසේ කැනීම් කර ඇති බවයි.
 
22 සහ 23 හැවිරිදි සහායකයන් දෙදෙනා ප‍්‍රධාන සැකකරුගේ ඥාතීන් වන අතර ඔවුන් අකුරැස්ස ප්‍රදේශයේ පදිංචි කරුවන් බවද පොලීසිය කියයි.
 
මෙම කටයුත්තේ යාගහෝම කරමින් සිටි කට්ටඩියා වැටලීම සිදුකරන අවස්ථාවේ පලාගොස් තිබේ.
අත්අඩංගුවට ගත් සැකකරුවන් තිදෙනා සහ භාණ්ඩ වැඩිදුර විමර්ෂණ කටයුතු සඳහා අක්මීමන පොලීසියට භාරදි තිබේ.
සැකකරුවන් තිදෙනා හෙට (20) ගාල්ල මහේස්ත‍්‍රාත්වරයා වෙතට ඉදිරිපත් කරන බව අක්මීමන පොලීසිය කියයි.