උපාලි ආනන්ද
හැර ගිය පෙම්වතා යලි ගෙන්වා දෙන බවට පොරොන්දු වී ගුරුකමක් සිදු කරන මුවාවෙන් තරුණියක අපයෝජනය කළ කට්ටඬියකුට උතුරු මැද පළාත් බද මහාධිකරණ විනිසුරු මහේෂ් වීරමන් මහතා වසර නවයක බරපතල වැඩ සහිත සිර දඬුවමක් අද නියම කළේය.
ඊට අමතරව රුපියල් 1000 ක දඩයක් ගෙවන ලෙසටද විත්තිකරුට නියෝග කළ මහාධිකරණ විනිසුරු වීරමන් මහතා පැමිණිලිකාර තරුණියට මුදලින් රුපියල් 50000 ක වන්දියක් ගෙවන ලෙසටද විත්තිකරුට තවදුටරත් නියෝග කළේය. එම දඩ මුදල් සහ වන්දි මුදල් ගෙවීම පැහැර හරින්නේ නම් විත්තිකරු තවත් වසරකුත් මාස තුනක සිර දඩුවමකටද යටත් කෙරිණි.
මෙසේ දඬුවම් නියම වූයේ මාවතගම පිලැස්ස කහගල්ල අංක 12 ලිපිනයේ රන්හොටී ගෙදර සුරේෂ් සෙල්ටන් ජයසුන්දර නැමැති පුද්ගලයකුටය.
2012 වසරේ ජූනි මස 28 වන දින හෝ ඊට ආසන්න දිනයක අනුරාධපුර මහාධිකරණ බල සීමාවට අයත් රාජාංගනයේදී විත්තිකරු මෙම අපරාධය සිදු කර ඇති බවට නීතිපතිවරයා විසින් ඔහුට එරෙහිව ලංකා දණ්ඩ නීති සංග‍්‍රහයේ 364 (1) වගන්තිය ප‍්‍රකාරව උතුරු මැද පලාත් බද මහාධිකරණය හමුවේ අධි චෝදනා ගොනු කරනු ලැබ තිබුණි
මෙම නඩුවේ පැමිණිලිකාර තරුණියගේ පෙම්වතා ඇය හැර ගොස් ඇති බවත් එම පෙම්වතා යලි ගෙන්වා දෙන බවට පොරොන්දු වී විත්තිකරු පමණක් පාළු ස්ථානයක තබා ගෙන ගුරුකමක් සිදු කරන මුවාවෙන් ඇය අපයෝජනය කර ඇති බවත් අධිකරණ නඩු විභාගයේදී අනාවරණ විය.
තරුණිය අපයෝජනය කර ඇති කට්ටඩියා පසුව තමා ජීවං කර ලබා දෙන තෙල් වර්ගයක් ශරීරයේ තවරා ගෙන දින ගනනක් පාළු පැලක තනියෙන් පෙම්වතා එනතුරු බලා සිටින ලෙසට තරුණියට උපදෙස් ලබා දී ඇත.
කට්ටඩියාගේ එම උපදෙස් වලට අනුව ජීවං කර ලබා දුන් බව කියන තෙල් තරුණිය ශරීරයේ තවරා ගෙන තනියෙන් පාළු පැලකට වී දින ගනක් පෙම්වතා එතැයි අපේක්ෂාවෙන් බලා සිට ඇති බවත් සති කිහිපයක් ගත වුවද කට්ටඩියා පැවසූ පරිදි ගුරුකම් බලයෙන් පෙම්වතා නොපැමිණිම නිසා කට්ටඩියා තමා අපයෝජනය කිරීමේ සිද්ධිය තරුණිය පොලිසියට පැමිණිලි කර ඇති බවත් අධිකරණ නඩු විභාගයේදි හෙළි විය.
