(අජිත්ලාල් ශාන්තඋදය සහ කපිල කුමාර)
මැණික් හා ස්වර්ණාභරණ අධිකාරියේ ආරක්‍ෂාව යටතේ පවතින කිරිඇල්ල, හැරණියාවක, කළු ගඟේ වක්කලම නම් මැණික් නිධියේ ඉල්ලම් සොයා කිමිදුම් කට්ටල හැඳගෙන දියට ගිය පුද්ගලයෙක් අතුරුදන්ව ඇතැයි අද (3) පැමිණිල්ලක් ලැබී ඇති බව කිරිඇල්ල පොලීසිය පවසයි.
මෙසේ අතුරදන්ව ඇත්තේ අවිස්සාවේල්ල, ඇස්වත්ත ප‍්‍රදේශයේ පදිංචිකරුවෙකු වූ ප‍්‍රියන්ත නැමැත්තෙකි.
රත්නපුර, දොඩම්පේ, තුන්අඳහේනේ පදිංචිකරුවකු වූ සුමේධ සංජීව නැමැති අය විසින් මෙම අතුරුදන්වීම ගැන කිරිඇල්ල පොලිසියට පැමිණිලි කර ඇත්තේ අද (3) අලුයම පහට පමණය.
මේ දිනවල කළුගඟේ ජල මට්ටම අඩුවී එම ස්ථානයේ වැල්ල මතුවී ඇතත් මෙම මැණික් නිධිය ඇති කැන ගැඹුර අඩි 35 ක් පමණ විය හැකි යැයි පොලීසිය අනුමාන කරයි.
අතුරුදන්වූ ප‍්‍රියන්ත සහ චමින්ද රත්නායක යන දෙදෙනා කිමිදුම් කට්ටල සිරුරේ බැඳගෙන දියයට කිමිදී ඉල්ලම් ගොඩගත් බවද පැමිණිලි කර පොලීසියට පවසා තිබිණි.
ඔක්සිජන් අවසන් වූ නිසා දියට ඉල්ලම් ගන්න ගිය චමින්ද රත්නායක ගොඩට ආ බවත් දිය යට ගිය ප‍්‍රියන්ත ආපසු උඩට නොපැමිණි නමුත් ඔහුගේ මුඛ ආවරණය උඩට මතුවූ බවත් පැමිණිලිකරු සිය පැමිණිල්ලෙන් දන්වා තිබිණි.
