(එම්.දසනායක සහ ටී.එච්.සරත්)

මහියංගනය ප්‍රදේශයේ සිට මාතලේ දක්වා පීඩාකාරී ලෙස ගවයන් ප්‍රවාහනය කල ලොරි රථයක් පසුපස හඹා ගිය පල්ලේකැලේ පොලීසියේ නිලධාරීන් කණ්ඩායමක් විසින්  අද (3) අලුයම ලොරි රථයට  වෙඩිතබා සිය බාරයට ගැනීමට සමත්ව ඇත.

පල්ලේකැලේ පොලීසියට ලද තොරතුරක් මත මහනුවර මහියංගන ප්‍රධාන මාර්ගයේ පල්ලේකැලේ ප්‍රදේශයේදී මාර්ග බාධක යොදා පරීක්ෂාව සිදුකරන අතරතුර සැක කටයුතු ලොරි රථයට නැවැත්වීමට අණ කලත් රියදුරු නොනවත්වා ධාවනය කොට ඇත.

පසුව ක්ෂණිකව ක්‍රියාත්මකවූ  පොලිස් නිලධාරීන් අදාල ලොරි රථය ලුහුබැඳ මහනුවර බදුල්ල රජ මාවතේ මයිලපිටිය ප්‍රදේශයේදී ලොරි රථයට වෙඩිතබා ඇත. පොලිස් වෙඩි ප්‍රහාරය මධ්‍යයේ නොනවත්වා ධාවනය කළ ලොරි රථය කන්දහන්දිය මංසන්ධියේ සිට මාරස්සන දක්වා ධාවනය කරන අතරතුරදී නාරන්කඩුව ප්‍රදේශයේදී නැවත වතාවක් පොලිස් වෙඩි ප්‍රහාරයට ලක්ව ඇත. ලොරි රථය නවතා දමා රියැදුරු පලාගොස් තිබේ.

එළවළු ප්‍රවාහනය කරන මුවාවෙන් ඉතාමත් හිංසාකාරී ලෙස ගවයන් 30ක් පමණ ලොරි රථයේ බැඳ දමා ගව මස් සඳහා රැගෙන යමින් සිටි බව පොලීසිය සඳහන් කරයි.