(එෆ්.අස්ලම්)
උතුරු පළාතේ සිසුන් 50ට වඩා අඩු පාසල් 250කට ආසන්න ප්‍රමාණයක් වසා දැමීම කෙරෙහි අධ්‍යාපන බලධාරීන්ගේ අවධානය යොමුවී ඇතැයි උතුරු පළාත් අධ්‍යාපන දෙපාර්තුමේන්තු ආරංචිමාර්ග සදහන් කරයි.
පාසල් 248ක් මෙලෙස වසා දැමීමට අවධානය යොමුකර ඇති අතර එම පාසල්වල සිසු සිසුවියන් අවට පාසල් වෙත මාරුකර යැවීමටද අධ්‍යාපන බලධාරීන් සාකච්ඡා කර සිටින බවද වාර්තා වේ.
එමෙන්ම මෙම පාසල්වල සිසු සිසුවියන් සංඛ්‍යාව වැඩි කර ගැනීමට උත්සහා කරන ලෙසට පාසල් බලධාරීන් වෙත දැනුම් දී ඇති අධ්‍යාපන බලධාරීන් එසේ නොවන්නේ නම් මේ වසර අවසානයේදී එම පාසල් වසා දැමීමට සිදුවන බවද දැනුම් දී තිබේ.
අවම වශයෙන් සිසුන් පනහකට හෝ අඩු පාසල් නඩත්තු කිරීම් සදහා පළාත් සභාවට අධික මුදලක් වැය කිරීමට සිදුවීමත් එසේ වැයකිරීමක් සිදුකළද එම පාසල්වලින් අපේක්ෂිත ප්‍රතිඵල නොලැබීමත් මත මේ පිළිබද තීරණයකට යාම ගැන සාකච්ඡාවට බජුන් වී තිබේ.
මේ සම්බන්ධයෙන් උතුරු පළාත් අධ්‍යාපන අමාත්‍යංශයේ ලේකම් සත්‍යසීලන් මහතාගෙන් ලංකාදීපය කළ විමසුමකදී සදහන් කර සිටියේ මේ සම්බන්ධයෙන් අවසන් තීරණයක් ගෙන නැති නමුදු උතුරු පළාතේ අධ්‍යාපනය නගා සිටුවීමේ පියවරක් වශයෙන් එවන් තීරණයකට යාම පිළීබද සාකච්ඡා කර සිටින බවය.
කෙසේ නමුත් කිලිනොච්චිය හා මුලතිව් යන දිස්ත්‍රික්කවල පිහිටි අතිදුෂ්කර ගම්මානවල එක් පාසලක් හා තවත් පාසලක් අතර දුර සැතපුම් පහකටත් අධික වීමත් එවන් තීරණයක් මැද සිසුන් ඉතාමත් අඩු පාසල් වසා දමමින් සිසුන් වැඩි ඒ අවට පාසල් වෙත ඇතුළත් කිරීම තුළින් සිසුසිසුවියන්ට බොහෝ දුරක් ඒමට සිදුවීමත් ගැනද අවධානය යොමුවී තිබෙන බවද හෙතෙම කීය.
මේ සම්බන්ධයෙන් අධ්‍යාපන බලධාරීන් සමගින් තවදුරටත් සාකච්ඡා කර දරුවන්ගේ අධ්‍යාපන මට්ටම ඉහළ දැමෙන ආකාරයේ තීරණයක් ගන්නා බවද ලේකම්වරයා අවසන් වශයෙන් කියා සිටියේය.
