(ඔගස්ටින් ප්‍රනාන්දු)
හලාවත ජයබිම ප්‍රදේශයේ ජනතාවගේ පොදු අවශ්‍යතා සඳහා වෙන් කර ඇති ඉඩමේ කොටසක් විදුලි බල මණ්ඩලයේ පාරිභෝගික සේවා මධ්‍යස්ථානය සඳහා ලබාදීමට පියවර ගැනීමට විරෝධය පළකරමින් ප්‍රදේශවාසීහු අද (4 ) නිහඬ විරෝධතාවක නිරත වුහ.
ඉඩම් පවරා ගැනීමේ පනත යටතේ ජයබිම වූ මෙම ඉඩම රජයට පවරා ගත් අතර, පසුව එම ඉඩම් ප්‍රතිසංස්කරණ කොමිසම වෙත පවරා ගත්තේය. එවකට සිටි සමගි පෙරමුණු ආණ්ඩුව විසින් ඉඩම් නොමැති පවුල් වෙත පර්චස් 20 බැගින් කොටස් පවරා දෙන ලදි.
ජයබිම සාම විහාරාධිපති සහ හලාවත ප්‍රාදේශීය ශාසනාරක්ෂක බල මණ්ඩලයේ සභාපති ආදා උල්පත සීලවංශ ස්වාමින් වහන්සේ මේ විරෝධතාව සම්බන්ධයෙන් මෙසේ පැවසූහ.
''මේ වන විට මෙහි පවුල් 3000ක් පමණ පදිංචිවි සිටිනවා. ඉඩමෙන් විශාල කොටසක් යම් යම් බලපෑම් මත විදුලි බල මණ්ඩලයේ පාරිභෝගික සේවා මධ්‍යස්ථානයක් පවත්වා ගෙන යන්න නොනිල වශයෙන් යොදා ගෙන තියෙනවා. වන සංරක්ෂණ කාර්යාලයත් මේ වන විට මෙහි පිහිටුවා කිබෙනවා. මේ නිසා දැන් ජනතාවට පොදු අවශ්‍යයතාව ඉටු කර ගන්න ස්ථානයක් නැතිවෙන්න පුලුවන්. ඒනිසා තමයි ජයබිම ජනතාව මෙම නිහඬ විරෝධතාව පවත්වන්නේ. මෙම ඉඩම වෙනත් කටයුතු සඳහා යොදා නොගෙන ජයබිම ජනතා අවශ්‍යතාවන් සදහා ස්ථිර වශයෙන් වෙන් කර දෙන ලෙස අපි ආණ්ඩුවෙන් ඉල්ලා සිටිනවා'' යයිද සීලවංශ හිමියෝ සඳහන් කළහ.
මෙම නිහඬ විරෝධතාව පැයක පමණ කාලයක් පැවැත්විණි.
